બેંગલુરુ : કર્ણાટકની સિદ્ધારમૈયા સરકારે રાજ્યની તિજોરી ભરવા માટે દારૂના શોખીનો પર મોટો આર્થિક બોજ નાખ્યો છે. સરકારે નવી 'આલ્કોહોલ-ઇન-બેવરેજ' (AIB) આધારિત એક્સાઇઝ ડ્યુટી સિસ્ટમ અમલમાં મૂકી છે, જેના કારણે રાજ્યમાં મળતી લગભગ તમામ નામી બ્રાન્ડ્સની MRPમાં મોટો ઉછાળો જોવા મળ્યો છે. ખાસ કરીને વ્હિસ્કી, રમ અને વોડકાના પ્રેમીઓ માટે હવે સાંજની મહેફિલ મોંઘી બનશે. બેંગલુરુ જેવા મેટ્રો સિટીમાં નવા દરો તાત્કાલિક અસરથી લાગુ કરી દેવામાં આવ્યા છે, જેના કારણે વાઇન શોપ અને બારમાં ગ્રાહકોના ખિસ્સા પર સીધી અસર પડી રહી છે.

સરકારે દારૂની કિંમતોને કુલ સાત સ્લેબમાં વિભાજિત કરી છે. બજેટ કેટેગરીમાં આવતા લેગસી સ્પેશિયલ અને અમૃત રમ જેવા બ્રાન્ડ્સના ભાવ ₹370 થી ₹485 ની વચ્ચે સ્થિર રાખવાનો પ્રયાસ થયો છે, પરંતુ મિડ-રેન્જ અને પ્રીમિયમ કેટેગરીમાં ભાવ વધારો આકરો છે. લોકપ્રિય બ્રાન્ડ્સ જેવી કે મેકડોવેલ નંબર 1 અને 8PM બ્લુ હવે ₹650 સુધી પહોંચી ગઈ છે. સૌથી વધુ ફટકો પ્રીમિયમ બ્રાન્ડ્સ પીનારાઓને પડ્યો છે; રોયલ સ્ટેગની 750ml ની બોટલ હવે ₹1,145 માં મળશે, જ્યારે બ્લેન્ડર્સ પ્રાઇડ અને સિગ્નેચર જેવી બ્રાન્ડ્સ માટે ગ્રાહકોએ ₹1,330 જેવી મોટી રકમ ચૂકવવી પડશે.

આ ભાવ વધારા પાછળ સરકારનો મુખ્ય ઉદ્દેશ્ય રાજસ્વ  વધારવાનો છે. આર્થિક વિશ્લેષકોનું માનવું છે કે નવી સિસ્ટમથી સરકારની આવકમાં કરોડો રૂપિયાનો ઉમેરો થશે, પરંતુ તેની સામે વેચાણની પેટર્ન બદલાવાની પણ પૂરી સંભાવના છે. વેપારીઓ ચિંતા વ્યક્ત કરી રહ્યા છે કે અચાનક થયેલા આ વધારાને કારણે ગ્રાહકો સસ્તી બ્રાન્ડ્સ તરફ વળી શકે છે અથવા સરહદી વિસ્તારોમાં પડોશી રાજ્યોમાંથી દારૂની હેરાફેરી વધી શકે છે. આગામી દિવસોમાં આ નવા દરોની અસર કર્ણાટકના પર્યટન અને હોસ્પિટાલિટી સેક્ટર પર કેવી પડશે તે જોવું રસપ્રદ રહેશે.