વડોદરા:ક્રેડિટ કાર્ડના માર્કેટમાં સ્પર્ધા વધારતા બેંક ઓફ બરોડાની પેટાકંપની BOBCARD લિમિટેડે તેના ગ્રાહકો માટે 'લાઇફટાઇમ ફ્રી' કાર્ડની એક આકર્ષક ઓફર રજૂ કરી છે. બેંકના સૌથી પ્રીમિયમ ગણાતા 'Eterna' ક્રેડિટ કાર્ડ પર હવે જોડાવા માટેની ફી કે વાર્ષિક મેન્ટેનન્સ ચાર્જ લેવામાં આવશે નહીં. સામાન્ય રીતે આ કાર્ડ માટે ગ્રાહકોએ ₹2,499 ચૂકવવા પડતા હતા, પરંતુ ૩૦ જૂન સુધી અરજી કરનારા નવા ગ્રાહકો માટે આ ફી સંપૂર્ણપણે માફ કરી દેવામાં આવી છે. આ ઓફરનો મુખ્ય ઉદ્દેશ્ય વધુમાં વધુ ગ્રાહકોને પ્રીમિયમ બેંકિંગ સુવિધાઓ સાથે જોડવાનો અને ડિજિટલ પેમેન્ટ ઇકોસિસ્ટમને મજબૂત બનાવવાનો છે.

આ કાર્ડ માત્ર ફી માફી પૂરતું મર્યાદિત નથી, પરંતુ તેમાં ગ્રાહકોને અનેક રોયલ સુવિધાઓ પણ આપવામાં આવી રહી છે. કાર્ડધારકોને મુસાફરી, ડાઇનિંગ અને આંતરરાષ્ટ્રીય વ્યવહારો પર ઊંચા રિવોર્ડ પોઈન્ટ્સ મળશે. આ ઉપરાંત, સ્થાનિક એરપોર્ટ લાઉન્જ એક્સેસ, ૧% ફ્યુઅલ સરચાર્જ માફી અને એક વર્ષની ફ્રી ફિટનેસ મેમ્બરશિપ જેવી સુવિધાઓ આ કાર્ડને વધુ આકર્ષક બનાવે છે. ખાસ કરીને વિદેશી પ્રવાસ કરનારા ગ્રાહકો માટે તેમાં લો ફોરેન માર્કઅપ ફીની સુવિધા આપવામાં આવી છે, જેનાથી આંતરરાષ્ટ્રીય ખરીદી સસ્તી પડશે. આ કાર્ડ RuPay, Visa અને Mastercard એમ ત્રણેય નેટવર્ક પર ઉપલબ્ધ રહેશે, જે ગ્રાહકોને તેમની પસંદગી મુજબનું પ્લેટફોર્મ પસંદ કરવાની સ્વતંત્રતા આપે છે.

ટેકનોલોજી સાથે તાલ મિલાવતા આ કાર્ડને UPI સાથે પણ લિંક કરી શકાશે, જેથી ગ્રાહકો ક્રેડિટ કાર્ડ દ્વારા સીધું જ સ્કેન એન્ડ પે કરી શકશે. એમેઝોન, ફ્લિપકાર્ટ અને મેક માય ટ્રીપ જેવા મોટા પ્લેટફોર્મ્સ પર પણ આ કાર્ડ દ્વારા વિશેષ ડિસ્કાઉન્ટ મેળવી શકાશે. અકસ્માત વીમા કવચ અને મનોરંજન ઓફર્સ સાથે આ કાર્ડ મધ્યમ અને ઉચ્ચ આવક ધરાવતા વર્ગ માટે શ્રેષ્ઠ વિકલ્પ સાબિત થઈ શકે તેમ છે. નિષ્ણાતોના મતે, વાર્ષિક ફી વગર પ્રીમિયમ કેટેગરીનું કાર્ડ આપવાની આ પહેલ અન્ય બેંકોને પણ તેમના ફી સ્ટ્રક્ચરમાં ફેરફાર કરવા મજબૂર કરી શકે છે.