મુંબઈ : ભારતની આર્થિક રાજધાની મુંબઈ ખાતે આંતરરાષ્ટ્રીય કૂટનીતિના મોરચે એક અત્યંત મહત્વપૂર્ણ અને ઉચ્ચસ્તરીય બેઠક યોજાઈ છે. વિદેશ મંત્રી ડૉ. એસ. જયશંકરે મુંબઈમાં સંયુક્ત આરબ અમીરાત (UAE) ના નાયબ વડા પ્રધાન અને વિદેશ પ્રધાન શેખ અબ્દુલ્લા બિન ઝાયેદ અલ નાહ્યાન તેમજ યુએસ સેક્રેટરી ઓફ સ્ટેટ માર્કો રુબિયો સાથે એક વિશેષ ત્રિપક્ષીય બેઠક યોજી હતી. આ બેઠકમાં મુખ્યત્વે ઊર્જા સુરક્ષા, કનેક્ટિવિટી અને સમકાલીન વૈશ્વિક વિકાસના મુદ્દાઓ પર ત્રણેય દેશોના શીર્ષ નેતાઓ વચ્ચે દ્રષ્ટિકોણનું ખૂબ જ ઉપયોગી અને ફળદાયી આદાનપ્રદાન થયું હતું.

આ ત્રિપક્ષીય બેઠક ઉપરાંત ડૉ. જયશંકરે યુએસ સેક્રેટરી ઓફ સ્ટેટ માર્કો રુબિયો સાથે અલગથી પણ દ્વિપક્ષીય વાતચીત કરી હતી. આ બેઠક દરમિયાન બંને દેશોના મંત્રીઓએ ભારત-અમેરિકા વચ્ચેના વ્યૂહાત્મક સંબંધોને વધુ મજબૂત બનાવવા, વેપાર, અદ્યતન ટેકનોલોજી, સંરક્ષણ ક્ષેત્રે સહયોગ અને લોકો વચ્ચેના પરસ્પર સંબંધોને વધુ ગાઢ બનાવવા પર વિશેષ ભાર મૂક્યો હતો. આ ચર્ચામાં વર્તમાન સમયની પશ્ચિમ એશિયાની કટોકટી સહિતના ગંભીર પ્રાદેશિક મુદ્દાઓ પર પણ ગહન ચિંતન કરવામાં આવ્યું હતું.

આજે વહેલી સવારે ડૉ. જયશંકરે UAE ના વિદેશ પ્રધાન શેખ અબ્દુલ્લા બિન ઝાયેદ સાથે પણ અલગથી મુલાકાત લીધી હતી. આ પ્રસંગે તેમણે જણાવ્યું હતું કે વૈશ્વિક અવરોધો અને અનેકવિધ પ્રાદેશિક પડકારો હોવા છતાં ભારત અને UAE વચ્ચેની આર્થિક ભાગીદારી નવા અને ઉચ્ચ માપદંડો સ્થાપિત કરી રહી છે. ખાસ કરીને વ્યાપક આર્થિક ભાગીદારી કરાર (CEPA) અમલમાં આવ્યા બાદ બંને દેશો વચ્ચેનો દ્વિપક્ષીય વેપાર ૧૦૦ અબજ યુએસ ડલરના આંકડાને વટાવી ગયો છે, જે બંને રાષ્ટ્રો વચ્ચેના ગાઢ આર્થિક વિશ્વાસનું પ્રતિક છે.

સંરક્ષણ, ઊર્જા અને ટેકનોલોજી ક્ષેત્રે બંને મિત્ર દેશોનો સહયોગ હવે એક મજબૂત વ્યૂહાત્મક સ્વરૂપ ધારણ કરી રહ્યો છે. મુંબઈમાં યોજાયેલી આ ત્રિપક્ષીય અને દ્વિપક્ષીય બેઠકોએ વૈશ્વિક મંચ પર ભારતની વધતી કૂટનીતિક પકડ અને આંતરરાષ્ટ્રીય ભાગીદારીઓને વધુ મજબૂત બનાવવાની દિશામાં એક મોટું પગલું સાબિત કર્યું છે.