એથેન્સ, તા. ૬ : ‘એથેન્સ ફ્લાઇંગ વીક’ દરમિયાન નીચી ઊંચાઈએ કરતબ બતાવી રહેલું એફ-૪ ફેન્ટમ વિમાન ઉડાન ભર્યાની થોડી મિનિટોમાં જ હવાઈ મથકથી આશરે બે કિલોમીટર દૂર તૂટી પડ્યું હતું. જમીન સાથે અથડાતાં વિમાન આગના ગોળામાં ફેરવાઈ ગયું અને આસપાસ ધુમાડાના ગોટેગોટા ફેલાયા હતા.

દુર્ઘટનામાં બંને પાઇલટનાં મૃત્યુ થયાં છે, પરંતુ દર્શકો કે સ્થાનિક રહેવાસીઓમાં કોઈ જાનહાનિ નોંધાઈ નથી. વિમાન પડવાથી નજીકના જંગલ વિસ્તારમાં આગ ભભૂકી ઊઠતાં વિમાનો અને હેલિકોપ્ટરો સહિત અગ્નિશામક દળને કામે લગાડાયું હતું. આયોજકોએ બાકીનું હવાઈ પ્રદર્શન રદ કરી દર્શકોને સલામત રીતે બહાર કાઢ્યા હતા. ગ્રીક વાયુસેનાએ ત્રણ દિવસનો શોક જાહેર કર્યો છે. દુર્ઘટનાનું ચોક્કસ કારણ જાણવા તપાસ શરૂ કરવામાં આવી છે.