ચેન્નઈ, તા.30: સાઉથ સિનેમા અને બોલિવૂડમાં પણ ચર્ચાનો વિષય બનેલી મણિરત્નમની ક્લાસિક ફિલ્મ 'રોઝા' માં યાદગાર ભૂમિકા ભજવીને દર્શકોના દિલ જીતી લેનાર પ્રખ્યાત અભિનેત્રી વત્સલા રાજગોપાલનું શુક્રવારે ચેન્નઈ ખાતે વૃદ્ધાવસ્થા સંબંધિત બીમારીઓના કારણે નિધન થયું છે, જેનાથી તમિલ મનોરંજન જગતમાં શોક છવાઈ ગયો છે.

પ્રાપ્ત વિગતો અનુસાર, ૧૯૩૩માં તિરૂવનંતપુરમમાં જન્મેલા વત્સલા રાજગોપાલે પોતાની કારકિર્દીની શરૂઆત એકાઉન્ટ ઓફિસમાં ક્લાર્ક તરીકે કરી હતી, પરંતુ બાળપણથી જ અભિનય પ્રત્યેના શોકને કારણે તેમણે ૬૦ વર્ષની વયે અભિનય ક્ષેત્રે પ્રવેશ કર્યો હતો અને ૧૯૯૨માં આવેલી સુપરહિટ ફિલ્મ 'રોઝા' થી ફિલ્મી સફરની શરઆત કરી હતી.

ઘટનાની વિગતવાર માહિતી આપતા અહેવાલોમાં જણાવવામાં આવ્યું છે કે પોતાની ત્રણ દાયકા લાંબી અભિનય કારકિર્દી દરમિયાન તેમણે 'રોઝા' ઉપરાંત 'ધામધુમ', 'મોઝી', 'સાથી લીલાવતી', 'રિધમ', 'અનિયન' અને 'કલ્યાણ સમાયલ સાદમ' જેવી અંદાજે ૪૦૦ જેટલી ફિલ્મોમાં વૈવિધ્યસભર ભૂમિકાઓ ભજવીને અદ્ભુત સફળતા મેળવી હતી.

ફિલ્મી પડદાની સાથે સાથે નાની સ્ક્રીન એટલે કે ટેલિવિઝન જગતમાં પણ તેઓ એટલા જ સક્રિય રહ્યા હતા, અને 'ચિથી', 'આનંદમ', 'મગલ' તથા અત્યંત લોકપ્રિય બનેલી સિરિયલ 'વસંતમ' જેવા અનેક પ્રખ્યાત ધારાવાહિકોમાં શાનદાર અભિનય આપીને ઘર-ઘરમાં લોકપ્રિયતા પ્રાપ્ત કરી હતી.

આ પીઢ અભિનેત્રીના નિધનથી તેમના પલ્લવરમ સ્થિત આવાસ પર પરિવારજનો અને કલા જગતના અગ્રણીઓ દ્વારા શ્રદ્ધાંજલિ અર્પણ કરવામાં આવી રહી છે, જ્યારે તેમની સાદગીભર્યા જીવન અને સમર્પિત કલાસાધનાને ચાહકો હંમેશાં યાદ રાખશે.

આગામી સમયમાં દક્ષિણ ભારતીય મનોરંજન ઉદ્યોગમાં તેમના આ યોગદાનને હંમેશાં એક પ્રેરણાદાયી માઈલસ્ટોન તરીકે યાદ કરવામાં આવશે, જે દર્શાવે છે કે ઉત્સાહ અને પ્રતિભા માટે ઉંમર ક્યારેય સીમા બનતી નથી.