ન્યૂયોર્ક: તા.૦૮ સોશિયલ મીડિયા અને ટેકનોલોજીની દુનિયામાં ૨.૨ કરોડથી વધુ સબ્સ્ક્રાઇબર્સ ધરાવતા ભારતીય મૂળના બ્રિટિશ યુટ્યુબર અરુણ મૈની, જેઓ 'MrWhoseTheBoss' તરીકે ઓળખાય છે, તેમણે વર્ષો પહેલા પોતાની સાથે અમેરિકામાં થયેલા અત્યાચારનો ચોંકાવનારો ખુલાસો કર્યો છે. એક ઇન્ટરવ્યુમાં તેમણે જણાવ્યું કે કેવી રીતે કારકિર્દીની સૌથી મોટી ઓફર સ્વીકારીને અમેરિકા પહોંચેલા તેમને ગુનેગારની જેમ રાખવામાં આવ્યા અને અપમાનિત કરવામાં આવ્યા હતા.
અરુણ મૈનીએ જણાવ્યું કે તેમને અમેરિકામાં એક હાઈ-ટેક સ્ટેડિયમના કવરેજ માટે $300,000 (આશરે ₹2.5 કરોડ) ની મોટી ઓફર મળી હતી. તેઓ ઉત્સાહ સાથે અમેરિકા પહોંચ્યા હતા, પરંતુ ઉતરતાની સાથે જ યુએસ બોર્ડર પેટ્રોલે તેમને અટકાવ્યા હતા. અધિકારીઓએ તેમને એક અંધારા ઓરડામાં લઈ જઈ ફોન છીનવી લીધો હતો, જેના કારણે તેઓ બહાર રાહ જોતા સ્પોન્સર્સ કે પોતાના પરિવારનો સંપર્ક પણ કરી શક્યા નહોતા.
સૌથી વધુ આઘાતજનક વાત એ હતી કે સશસ્ત્ર ગાર્ડ્સ તેમને એક સેલમાં લઈ ગયા અને ત્યાં તેમને નિર્વસ્ત્ર કરી (Strip-search) તેમની તલાશી લેવામાં આવી હતી. અરુણ મૈનીએ આ અનુભવને અત્યંત અપમાનજનક ગણાવતા કહ્યું કે, "તે ક્ષણે મને ખૂબ જ ડર લાગી રહ્યો હતો અને મને એવું લાગ્યું કે મારા માનવ અધિકારોનું ઉલ્લંઘન થઈ રહ્યું છે." તેમને ૨૬ કલાક સુધી અટકાયતમાં રાખવામાં આવ્યા હતા અને ખાવા-પીવાની પણ યોગ્ય વ્યવસ્થા નહોતી.
આ કડવા અનુભવના અંતે અમેરિકી સત્તાવાળાઓએ તેમને ડિપોર્ટ (દેશનિકાલ) કરવાનો નિર્ણય લીધો હતો. તેમને વિમાનમાં બેસાડી દેવામાં આવ્યા અને પ્લેન ઉડાન ભરે ત્યાં સુધી તેમનો ફોન પણ પાછો આપવામાં આવ્યો નહોતો. અરુણે દુઃખ સાથે જણાવ્યું કે આ ઘટનાની અસર આજે પણ છે; હવે જ્યારે પણ તેઓ અમેરિકા જાય છે, ત્યારે તેમના નામ સામે 'બ્લેક માર્ક' હોવાને કારણે તેમને દર વખતે સ્પેશિયલ ઇન્ટરવ્યુ અને કડક તપાસમાંથી પસાર થવું પડે છે.