​નવી દિલ્હી: પોતાની ગાયકી અને અનોખા અંદાજથી લાખો લોકોના દિલ જીતનાર જાણીતી ઈન્ડો-અમેરિકન ગાયિકા જેસ્મિન સન્ડલસે પોતાની અંગત જિંદગીના સૌથી મોટા રહસ્ય પરથી પડદો ઉઠાવ્યો છે. દિલ્હીમાં યોજાયેલા પોતાના મ્યુઝિકલ કોન્સર્ટ ‘ધ ડ્રીમ ગર્લ ઈન્ડિયા ટૂર’ દરમિયાન ગાયિકાએ સ્ટેજ પરથી જ પોતાની સગાઈની સત્તાવાર જાહેરાત કરીને ઉપસ્થિત હજારો ચાહકોને ચોંકાવી દીધા હતા.

​કોન્સર્ટ દરમિયાન એક ખાસ ક્ષણે જેસ્મિને માઈક સંભાળતા પોતાની ખુશી વ્યક્ત કરી હતી. ગાયિકાએ મંચ પર જ પોતાના મંગેતર શેખર ચૌધરીને બોલાવીને ફેન્સ સાથે તેમની ઓળખાણ કરાવી હતી. આ દરમિયાન ગાયિકા ખૂબ જ ઉત્સાહિત જોવા મળી હતી અને તેમણે ગર્વ સાથે પોતાની સગાઈની વીંટી પણ દર્શકોને બતાવી હતી. તેમણે પ્રેક્ષકોને સંબોધતા કહ્યું કે, “આ તે વ્યક્તિ છે જેમણે મને વીંટી પહેરાવી છે. મિત્રો, આ મારા મંગેતર છે.”

​આ આશ્ચર્યજનક ખુલાસા બાદ કોન્સર્ટનું વાતાવરણ એકદમ બદલાઈ ગયું હતું. જેસ્મિન અને શેખરે મંચ પર જ સાથે મળીને તેમના લોકપ્રિય રોમેન્ટિક ગીત ‘લાવાં’ પર ડાન્સ કર્યો હતો, જેણે ત્યાં હાજર દરેક પ્રેક્ષકોના દિલ જીતી લીધા હતા. આ ખાસ પળનો વીડિયો સોશિયલ મીડિયા પર ખૂબ જ ઝડપથી વાયરલ થઈ રહ્યો છે.

​ઉલ્લેખનીય છે કે, દિલ્હીના યશોભૂમિ કન્વેન્શન સેન્ટરમાં આયોજિત આ કાર્યક્રમમાં જેસ્મિને પોતાના સુપરહિટ ગીતો જેવા કે ‘તરસ’, ‘ઈલીગલ વેપન’, ‘સિપ સિપ’ અને ‘ધુરંધર’ આલ્બમના ગીતો રજૂ કરીને ધૂમ મચાવી હતી. ગાયિકાના આ ઈન્ડિયા ટૂરના ભાગરૂપે હવે તેઓ આગામી દિવસોમાં મુંબઈ, બેંગલુરુ અને ચંદીગઢમાં પણ પોતાની કલાનું પ્રદર્શન કરવાના છે. જેસ્મિનના ચાહકો હવે તેમની આ નવી સફરને લઈને ખૂબ જ ઉત્સાહિત દેખાઈ રહ્યા છે અને સોશિયલ મીડિયા પર તેમને શુભેચ્છાઓ પાઠવી રહ્યા છે.