ફરીદાબાદ : હરિયાણાના ફરીદાબાદની ગ્રીન ફીલ્ડ કોલોનીમાં ઓનલાઇન શોપિંગ કંપનીના ડિલિવરી બોય વીરપ્રતાપે પારસલ પહોંચાડવાના બહાને એક મકાનમાં પ્રવેશ કરીને સાસુ અને વહુને છરી બતાવી જાનથી મારી નાખવાની ધમકી આપીને રોકડ તથા કિંમતી સોના-ચાંદીના દાગીનાની લૂંટ ચલાવવાની સનસનાટીભરી ઘટના સામે આવી છે, જેને લઈને પોલીસે ટેકનિકલ સર્વેલન્સ અને સીસીટીવી ફૂટેજની મદદથી આરોપીને દબોચી લીધો છે.

પોલીસ તપાસમાં ખુલાસો થયો છે કે આરોપી વીરપ્રતાપ અગાઉ પણ તે જ સોસાયટીમાં પાર્સલ પહોંચાડવા માટે જતો હોવાના કારણે તેને ઘરની આસપાસની તમામ માહિતી હતી અને ઘટનાના દિવસે ઘરમાં માત્ર બે મહિલાઓ જ હોવાની ખાતરી થતાં જ તેણે તીક્ષ્ણ હથિયાર બતાવી બંનેને બંધક બનાવી લીધી હતી તેમજ ભયનો માહોલ ઊભો કરીને ઘરમાં પડેલી રોકડ અને દાગીના લૂંટીને ફરાર થઈ ગયો હતો.

આ બનાવ અંગે પીડિત પરિવાર દ્વારા પોલીસ મથકમાં ફરિયાદ નોંધાવવામાં આવતાં ક્રાઇમ બ્રાન્ચ અને સ્થાનિક પોલીસની ટીમોએ તાત્કાલિક ધોરણે હરકતમાં આવીને ઘટનાસ્થળ આસપાસના સીસીટીવી કેમેરાના ફૂટેજ ઝીણવટપૂર્વક તપાસ્યા હતા, જેમાં શંકાસ્પદ ડિલિવરી બોયની હિલચાલ સ્પષ્ટ રીતે કેદ થઈ ગઈ હતી અને પોલીસે ઝડપી દરોડો પાડીને આરોપીની અટકાયત કરી લીધી છે.

પોલીસ પૂછપરછમાં આરોપીએ પોતાનો ગુનો કબૂલી લીધો છે અને પોલીસે તેની પાસેથી લૂંટાયેલો મુદ્દામાલ તેમજ ગુનામાં વપરાયેલું હથિયાર રિકવર કરવાની તજવીજ હાથ ધરી છે, જ્યારે આ ઘટના બાદ ફરીદાબાદ પોલીસે નાગરિકોને અજાણ્યા ડિલિવરી બોય કે સેલ્સમેનને ઘરમાં પ્રવેશ આપતા પહેલા સંપૂર્ણ ઓળખ ચકાસવા માટે કડક ચેતવણી આપી છે.