મુંબઈ, તા.28: મહારાષ્ટ્રમાં ખેડૂતો, ખેતમજૂરો, આદિવાસીઓ અને કામદારોના વિવિધ પ્રશ્નોના નિરાકરણની માંગ સાથે અહિલ્યાનગર જિલ્લાના અકોલેથી શરૂ થયેલી વિશાળ વાહન માર્ચ અને પદયાત્રાને સરકાર સાથેની સફળ બેઠક બાદ હાલ પૂરતી સ્થગિત કરવામાં આવી છે. રાજ્યના મુખ્ય પ્રધાન દેવેન્દ્ર ફડણવીસ અને કિસાન સભાના પ્રતિનિધિમંડળ વચ્ચે યોજાયેલી ઉચ્ચસ્તરીય બેઠકમાં સરકારે વિવિધ માંગણીઓ પર સકારાત્મક કાર્યવાહી કરવાની ખાતરી આપતા આ આંદોલન પર પૂર્ણવિરામ મુકાયું છે.

પ્રાપ્ત વિગતો અનુસાર, કિસાન સભાની આગેવાની હેઠળ ૨૬ ઓક્ટોબરથી શરૂ થયેલી આ માર્ચ નાશિકથી થઈને થાણે જિલ્લાના શાહપુર સુધી પહોંચી હતી, જ્યાં હજારો ખેડૂતોએ દુષ્કાળગ્રસ્ત સહાય, પાક વીમાની રકમ, લોનમાફી અને જમીન અધિકારો જેવા મહત્વના મુદ્દાઓ માટે અવાજ બુલંદ કર્યો હતો. આંદોલનની વ્યાપકતાને ધ્યાનમાં લઈને વહીવટી તંત્ર દ્વારા તાત્કાલિક ધોરણે વાટાઘાટોના પ્રયાસો હાથ ધરવામાં આવ્યા હતા.

સરકાર સાથેની આ બેઠકમાં ચર્ચા થયેલા મુદ્દાઓ અંગે માહિતી આપતા કિસાન સભાએ જણાવ્યું કે સરકારે રાષ્ટ્રીય આપત્તિ પ્રતિસાદ ભંડોળના ધોરણો કરતાં વધુ સહાય દુષ્કાળગ્રસ્ત ખેડૂતોને આપવાનું આશ્વાસન આપ્યું છે. આ ઉપરાંત નિયમિત લોન ભરપાઈ કરતા ખેડૂતોની પ્રોત્સાહક રકમ અને પાક વીમા યોજનાના પ્રશ્નો અંગે પણ લોનમાફી ઉપસમિતિ દ્વારા યોગ્ય નિર્ણય લેવાની ખાતરી અપાઈ છે.

આ બેઠકમાં જમીન અધિકારોના મુદ્દા પર વિશેષ ચર્ચા કરવામાં આવી હતી, જેમાં દેવસ્થાન અને ગૌચરની જમીન પર ખેતી કરતા પાત્ર ખેડૂતોને માલિકી હક આપવા માટે કાયદાકીય પ્રક્રિયા હાથ ધરવામાં આવશે તેમ જણાવવામાં આવ્યું હતું. મહેસૂલ પ્રધાન ચંદ્રશેખર બાવનકુળેએ સ્પષ્ટ કર્યું હતું કે સૂચિત સમિતિમાં કિસાન સભાના પ્રતિનિધિઓને વિશેષ આમંત્રિત તરીકે સામેલ કરવામાં આવશે.

મહિલાઓની 'લાડકી બહિણ' યોજના સંદર્ભે કેવાયસી (KYC) પ્રક્રિયા અપૂર્ણ હોવાને કારણે રદ થયેલી સહાય પુનઃ શરૂ કરવા અને બાંધકામ કામદારો તથા શાળા પોષણ યોજનાના કર્મચારીઓના વેતન વધારા અંગે પણ સરકાર દ્વારા સકારાત્મક અભિગમ દાખવવામાં આવ્યો છે. તમામ પક્ષોની સહમતિથી આદિવાસીઓના પ્રશ્નો અને લિફ્ટ ઇરિગેશન યોજનાઓ અંગે પણ ગંભીરતાથી વિચારણા કરવાના આદેશો અપાયા છે.

ખેડૂત સંગઠનની માંગણીઓના અમલીકરણની પ્રત્યક્ષ સમીક્ષા કરવા માટે આગામી ૪ નવેમ્બરે પુનઃ એક મહત્વપૂર્ણ બેઠકનું આયોજન કરવામાં આવ્યું છે. હાલ પૂરતી માર્ચ સ્થગિત કરવામાં આવી છે, પરંતુ આગામી બેઠકમાં સરકારના નિર્ણયોના આધારે આંદોલનની ભાવિ દિશા નક્કી કરવામાં આવશે.