તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
છ મહિનાનો હતો ત્યારે પિતાની હત્યા થઈ હતીઃ ૨૩ વર્ષ સુધી વેર હૈયામાં રાખી આખરે હત્યારાને મોતને ઘાટ ઉતાર્યો
બે દાયકા પછી બોલીવુડ સ્ટાઇલ બદલો લીધો
મુંબઈ,તા.૨૨: મહારાષ્ટ્રના પુણે જિલ્લાના ભોર તાલુકામાં સામે આવેલા હત્યાકાંડમાં પોલીસે એવો ખુલાસો કર્યો છે કે એક યુવકે પોતાના પિતાની હત્યાનો તેવીસ વર્ષ જૂનો વેર આખરે આરોપીની હત્યા કરીને લીધો હોવાનો આરોપ છે. પોલીસે ચોવીસ વર્ષીય મંથન વૈદ્ય સહિત ચાર આરોપીઓની ધરપકડ કરી છે.
પોલીસના જણાવ્યા મુજબ અગિયાર જુલાઈએ જૂના કાત્રજ ટનલ નજીક શિદેવાડી વિસ્તારમાં સંજય બાબુરાવ કડુ-દેશમુખનો ધારદાર હથિયારના ઘા મારીને ખૂન કરવામાં આવ્યો હતો. રાજગઢ પોલીસ સ્ટેશનમાં હત્યાનો ગુનો નોંધાયા બાદ સ્થાનિક ગુના શાખાએ સીસીટીવી, ટેકનિકલ પુરાવા અને ગુપ્ત માહિતીના આધારે તપાસ આગળ વધારી હતી. ત્યારબાદ મંથન વૈદ્ય, સૌરભ પરદેશી, સંદીપ કોરી અને મિઝાન શેખની સંડોવણી બહાર આવી હતી.
તપાસ દરમિયાન આરોપી મંથને પોલીસ સમક્ષ જણાવ્યું કે વર્ષ બે હજાર ત્રણમાં તે માત્ર છ મહિનાનો હતો ત્યારે નજીવી તકરારમાં સંજય કડુ-દેશમુખે તેના પિતા દિનેશ વૈદ્યની હત્યા કરી હતી. બાળપણથી જ પિતાના હત્યારાને સજા આપવાનો સંકલ્પ તેણે મનમાં રાખ્યો હતો અને તક મળતા સાથીદારો સાથે મળીને કાવતરું ઘડી હત્યા કરી હોવાનું પોલીસે જણાવ્યું છે.
પોલીસે વધુમાં જણાવ્યું કે મૃતક સંજય કડુ-દેશમુખ સામે અગાઉ પણ અનેક ગુનાહિત કેસ નોંધાયેલા હતા અને તે અન્ય એક હત્યા કેસમાં જામીન પર બહાર આવ્યો હતો. ચારેય આરોપીઓ સામે ભારતીય ન્યાય સંહિતાની સંબંધિત કલમો હેઠળ ગુનો નોંધવામાં આવ્યો છે અને સમગ્ર ઘટનાની વધુ તપાસ ચાલુ છે.
(10:36 AM IST)
છેલ્લા 8 દિવસમાં સૌથી લોકપ્રિય 
