રિયાધ : મધ્યપૂર્વ (મિડલ ઈસ્ટ)માં ચાલી રહેલા ભીષણ સંઘર્ષ વચ્ચે પરિસ્થિતિ વધુ વિસ્ફોટક બની છે. યમનના હૂતી સંગઠને સાઉદી અરેબિયાના અત્યંત મહત્વપૂર્ણ એરપોર્ટ, તેલ મથકો અને સૈન્ય ઠેકાણાઓને નિશાન બનાવીને શ્રેણીબદ્ધ ડ્રોન અને મિસાઇલ હુમલા કર્યાનો સનસનાટીપૂર્ણ દાવો કર્યો છે. આ ભયાનક ઘટનાક્રમને પગલે સમગ્ર પ્રદેશમાં સુરક્ષા અંગે ગંભીર ચિંતા ઊભી થઈ છે અને વૈશ્વિક સ્તરે ઉત્તેજના વ્યાપી ગઈ છે.

હૂતી સંગઠને રાજધાની રિયાધના વ્યસ્ત કિંગ ખાલિદ ઇન્ટરનેશનલ એરપોર્ટ ઉપરાંત દમ્મામના કિંગ ફહદ ઇન્ટરનેશનલ એરપોર્ટ અને અભા એરપોર્ટ પર હુમલા કર્યાનો દાવો કર્યો છે. આટલું જ નહીં, લાલ સમુદ્રના કિનારે આવેલા સાઉદીના મહત્વપૂર્ણ ઊર્જા કેન્દ્ર યાનબૂ સ્થિત 'સાઉદી અરામકો' (Saudi Aramco)ની સુવિધાઓ અને રાબિઘની વિશાળ રિફાઇનરીને પણ નિશાન બનાવાઈ છે. 24 ઓક્ટોબરે સાઉદીના નેતૃત્વવાળા ગઠબંધને તાઇફ અને યાનબૂ તરફ છોડાયેલી બે બેલિસ્ટિક મિસાઇલોને હવામાં જ તોડી પાડી હતી, જ્યારે રિયાધ અને મદીનાના વિસ્તારોમાં પણ ડ્રોન નિષ્ફળ બનાવાયા હતા.

જોકે, હૂતી વિદ્રોહીઓ દ્વારા કરવામાં આવેલા તમામ દાવાઓ અને નુકસાન અંગે સાઉદી અરેબિયાના અધિકારીઓ તરફથી હજુ સુધી કોઈ સ્વતંત્ર પુષ્ટિ મળી નથી. જો સાઉદી અરેબિયાના એરપોર્ટ અને તેલ મથકો પર સતત આ પ્રકારનું જોખમ જળવાયેલું રહેશે, તો આંતરરાષ્ટ્રીય હવાઈ પરિવહન પર માડી અસર પડવા સાથે વૈશ્વિક તેલ ઉત્પાદન અને નિકાસનું નેટવર્ક ખોરવાઈ જવાની ભીતિ સેવાઈ રહી છે.

ઉલ્લેખનીય છે કે સાઉદી નેતૃત્વવાળા ગઠબંધન અને હૂતી સંગઠન વચ્ચે લાંબા સમયથી ચાલી રહેલા સંઘર્ષે હવે અત્યંત ગંભીર વળાંક લીધો છે. વૈશ્વિક સમુદાય અને સૈન્ય નિષ્ણાતો આ સમગ્ર ઘટનાક્રમ પર તીક્ષ્ણ નજર રાખી રહ્યા છે. આ પરિસ્થિતિને ધ્યાનમાં રાખીને આગામી દિવસોમાં સાઉદી અરેબિયા દ્વારા લેવાનારા આકરા સૈન્ય પગલાં અને બહાર પાડવામાં આવનારા સત્તાવાર નિવેદનો મિડલ ઈસ્ટના ભવિષ્ય માટે અત્યંત નિર્ણાયક સાબિત થશે.