આગ્રા:ઉત્તર પ્રદેશના મુખ્યમંત્રી યોગી આદિત્યનાથ દ્વારા આગ્રા ખાતે ૨૬ જુલાઈએ ઉચ્ચ શિક્ષણ વિભાગના શિક્ષકો અને કર્મચારીઓ માટે મુખ્યમંત્રી શિક્ષક કેશલેસ તબીબી સુવિધા યોજનાનો શુભારંભ કરીને ૧.૫ કરોડ રૂપિયા સુધીના અકસ્માત વીમા કવચની ઐતિહાસિક જાહેરાત કરવામાં આવી છે.

આ યોજના અંતર્ગત પીએનબી સાથે વિશેષ એમઓયુ કરવામાં આવ્યું છે, જેના થકી શિક્ષકોને વ્યક્તિગત અકસ્માત વીમો, હવાઈ અકસ્માત વીમો, હોસ્પિટલ રોકડ લાભ અને ટર્મ લાઇફ વીમા જેવા વ્યાપક નાણાકીય લાભો પ્રદાન કરવામાં આવશે.

રાજ્યની યુનિવર્સિટીઓ, સહાયિત કોલેજો અને સ્વ-નાણાકીય અભ્યાસક્રમોમાં ફરજ બજાવતા ૧.૨૮ લાખથી વધુ શિક્ષકો તથા તેમના આશ્રિત પરિવારોને આ યોજનાના માધ્યમથી સૂચિબદ્ધ હોસ્પિટલોમાં ૫ લાખ રૂપિયા સુધીની નિઃશુલ્ક કેશલેસ સારવાર મળતી થશે.

કાર્ડનું વિતરણ થતાની સાથે જ લાભાર્થીઓ પહેલા દિવસથી જ હોસ્પિટલમાં દાખલ થવાની પ્રક્રિયાથી લઈને દવાઓ અને ડિસ્ચાર્જ સુધીના તમામ તબીબી ખર્ચમાંથી મુક્તિ મેળવીને ગુણવત્તાયુક્ત સ્વાસ્થ્ય સેવાઓનો સીધો લાભ પ્રાપ્ત કરી શકશે.

સરકારના આ મહત્વપૂર્ણ પગલાથી શૈક્ષણિક સ્ટાફની દીર્ઘકાલીન માંગણીઓ સંતોષાઈ છે અને કર્મચારીઓમાં સુરક્ષાની ભાવના વધવાની સાથે શિક્ષણ ક્ષેત્રે ઉત્સાહનું મોજું ફરી વળ્યું છે, જે સમગ્ર રાજ્યમાં આવકારદાયક પગલું સાબિત થયું છે.

આગામી સમયમાં તમામ જિલ્લાઓ સ્તરે પણ આવા વિતરણ કાર્યક્રમો યોજવામાં આવશે અને વહીવટી તંત્ર દ્વારા આ યોજનાના અસરકારક અમલીકરણ માટે સતત દેખરેખ રાખવામાં આવશે..