લોસ એન્જલસ, તા.૧૯: આગામી મહિનાથી અમેરિકા, કેનેડા અને મેક્સિકોના સંયુક્ત યજમાનપદે શરૂ થઈ રહેલા રમતગમત જગતના સૌથી મોટા મહાકુંભ 'ફિફા વર્લ્ડ કપ ૨૦૨૬' (FIFA World Cup 2026) ના આયોજન પર વિવાદોના વાદળો ઘેરાયા છે. અમેરિકાના લોસ એન્જલસમાં આવેલા વિશ્વના સૌથી મોંઘા રમતગમત ક્ષેત્ર 'સોફી સ્ટેડિયમ' (SoFi Stadium) ના હજારો કામદારોએ સોમવારે એક થઈને હડતાળ પર જવાની સત્તાવાર પ્રતિજ્ઞા લીધી છે. કામદારોની માંગ છે કે જો સ્ટેડિયમમાં મેચો દરમિયાન ફેડરલ ઇમિગ્રેશન એન્ફોર્સમેન્ટ (ICE) ના એજન્ટો તૈનાત કરવામાં આવશે, તો તેઓ કામગીરીથી અલિપ્ત રહેશે.

આશરે ૨,૦૦૦ જેટલા હોસ્પિટાલિટી અને ફૂડ-બેવરેજીસ કન્સેશન સ્ટાફનું પ્રતિનિધિત્વ કરતી શક્તિશાળી યુનિયન 'UNITE HERE Local 11' આ મામલે સરકાર પાસે લેખિત ગેરંટી માંગી રહી છે. સ્ટેડિયમમાં યોજાનારી વર્લ્ડ કપની આઠ મહત્વપૂર્ણ મેચોમાંથી એક પણ મેચ દરમિયાન ઇમિગ્રેશન અને કસ્ટમ્સ એન્ફોર્સમેન્ટ (ICE) નો ઉપયોગ ન થવો જોઈએ. કામદારોનું કહેવું છે કે આ એજન્સીની હાજરીથી સ્ટેડિયમમાં કામ કરતા કર્મચારીઓ તેમજ મેચ જોવા આવનારા લાખો વિદેશી ચાહકોમાં ભારે ભય અને અસુરક્ષાનું વાતાવરણ ઊભું થશે.

"કામ પર આવતા ડર અને ઘરે જતાં અટકાયતનો ભય સહન નહીં થાય"

વિરોધ પ્રદર્શન દરમિયાન સ્ટેડિયમના મુખ્ય રસોઇયા (Chef) આઇઝેક માર્ટિનેઝે આક્રોશ વ્યક્ત કરતા જણાવ્યું હતું કે, "આ આંતરરાષ્ટ્રીય રમત ઉત્સવમાં ICE જેવી કડક એજન્સીની કોઈ જ ભૂમિકા હોવી જોઈએ નહીં. અમે રોજગાર માટે સ્ટેડિયમ આવતી વખતે મનમાં ફાળ કે ઘરે પરત ફરતી વખતે અટકાયત (Detention) નો ડર રાખવા માંગતા નથી. જો અમારી માંગણીઓ સંતોષવામાં નહીં આવે, તો અમે ટૂર્નામેન્ટની વચ્ચે જ હડતાળ પર ઉતરી પડીશું."

આ વિરોધ પાછળનું મુખ્ય કારણ રાષ્ટ્રપતિ ડોનાલ્ડ ટ્રમ્પના શાસનકાળ દરમિયાન ઇમિગ્રેશન નિયમો પર કરાયેલી કડક કાર્યવાહી છે. ગત વર્ષોમાં લોસ એન્જલસ સહિતના શહેરોમાં કરાયેલા દરોડા અને તાજેતરમાં જ વર્ષ ૨૦૨૬ ની શરૂઆતમાં મિનિયાપોલિસમાં બે પ્રદર્શનકારીઓ પર થયેલા ફાયરિંગને કારણે માનવ અધિકાર સંગઠનો આ એજન્સીની કાયદાવિહીન કાર્યશૈલીની ભારે નિંદા કરી રહ્યા છે.

ડેટા લીક થવાની ચિંતા અને રાજકીય સમર્થન

આ આંદોલન માત્ર એજન્ટોની હાજરી પૂરતું સીમિત નથી, પરંતુ કામદારોએ ફિફા (FIFA) ની એક્રેડિટેશન (માન્યતા) પ્રક્રિયા પર પણ ગંભીર ચિંતા વ્યક્ત કરી છે. આ પ્રક્રિયા હેઠળ ટુર્નામેન્ટ શરૂ થતાં પહેલાં દરેક કર્મચારીનો પર્સનલ ડેટા સબમિટ કરવો ફરજિયાત છે. કર્મચારી યોલાન્ડા ફિઅરોએ આ અંગે જણાવ્યું કે, અમે ફિફાને સખત વિનંતી કરીએ છીએ કે અમારો આ ગુપ્ત ડેટા કોઈપણ સંજોગોમાં ICE એજન્સી, ગુપ્તચર સેવાઓ કે વિદેશી દેશો સાથે શેર કરવામાં ન આવે. આ દરમિયાન પ્લાસ્ટિકના ફૂટબોલ અને "કિક ICE આઉટ ઓફ ધ વર્લ્ડ કપ" ના બેનરો સાથે પ્રદર્શન કરી રહેલા કામદારોને કેલિફોર્નિયાના ગવર્નર પદની ચૂંટણીના અગ્રણી ડેમોક્રેટિક ઉમેદવાર અને અબજોપતિ રાજકારણી ટોમ સ્ટેયરનું મોટું સમર્થન મળ્યું છે. તેમણે સવાલ ઉઠાવ્યો હતો કે સરહદ નિયંત્રણ કરતી એજન્સીનો સ્પોર્ટ્સ સાથે શું સંબંધ હોઈ શકે?

૧૧ જૂનથી જામશે મહામુકાબલો

અત્રે ઉલ્લેખનીય છે કે, આગામી ૧૧ જૂનથી ૧૯ જુલાઈ, ૨૦૨૬ દરમિયાન અમેરિકા, કેનેડા અને મેક્સિકોની ધરતી પર ફિફા વર્લ્ડ કપનું ભવ્ય આયોજન થવા જઈ રહ્યું છે. તેવામાં જો લોસ એન્જલસ જેવા મુખ્ય સેન્ટર પર જ હોસ્પિટાલિટી સ્ટાફ હડતાળ પર ઉતરી જશે, તો મેચોના સંચાલન અને પ્રવાસીઓની સુવિધા ખોરવાઈ જવાની પૂરી સંભાવના છે, જે વૈશ્વિક સ્તરે અમેરિકા માટે ક્ષોભજનક સ્થિતિ પેદા કરી શકે છે.