નવી દિલ્‍હી, તા.૫: વર્ષ ૨૦૧૯ની જામિયા હિંસા અને ૨૦૨૦ના ઉત્તરપૂર્વ દિલ્‍હી રમખાણોના સંદર્ભમાં ભડકાઉ ભાષણો આપવાના ગંભીર આરોપોનો સામનો કરી રહેલા દેશના અગ્રણી રાજકારણીઓની મુશ્‍કેલીઓ હાલ પૂરતી હળવી થઈ ગઈ છે. દિલ્‍હી હાઈકોર્ટે વિપક્ષી નેતા રાહુલ ગાંધી, પૂર્વ કેન્‍દ્રીય મંત્રી અનુરાગ ઠાકુર, સોનિયા ગાંધી, પ્રિયંકા ગાંધી, ભાજપના નેતા કપિલ મિશ્રા, પ્રવેશ વર્મા, અભય વર્મા તથા આપ નેતા મનીષ સિસોદિયા સહિતના અનેક દિગ્‍ગજ નેતાઓ સામે FIR દાખલ કરવાનો આદેશ આપવાની માંગ કરતી તમામ અરજીઓને સત્તાવાર રીતે ફગાવી દીધી છે. કોર્ટના આ મોટા નિર્ણયથી હાઇપ્રોફાઇલ નેતાઓને મોટી રાહત મળી છે.

આ મામલે અદાલતમાં વિવિધ પક્ષકારો દ્વારા અનેક અરજીઓ દાખલ કરવામાં આવી હતી, જેમાં શેખ મુજતબા નામના અરજદારે ભાજપના નેતાઓ સામે એફઆઈઆર નોંધાવવાની માંગ કરી હતી, જ્‍યારે અન્‍ય અરજીઓમાં કોંગ્રેસ અને આમ આદમી પાર્ટીના શીર્ષ નેતાઓ વિરુદ્ધ પણ કડક કાર્યવાહીની માંગ ઉઠાવવામાં આવી હતી. આ ઉપરાંત, રમખાણો દરમિયાન કથિત બેદરકારી દાખવનાર કે ભૂલ કરનાર પોલીસકર્મીઓ સામે ખાતાકીય કે ફોજદારી કાર્યવાહી કરવાની તેમજ સમગ્ર ઘટનાક્રમની સ્‍વતંત્ર એસઆઈટી દ્વારા તપાસ કરાવવાની માંગ પણ અરજીઓમાં કરવામાં આવી હતી જેને હાઈકોર્ટે માન્‍ય રાખી ન હતી.

દિલ્‍હી હાઈકોર્ટના જસ્‍ટિસ વિવેક ચૌધરી અને જસ્‍ટિસ મનોજ જૈનની સંયુક્‍ત બેન્‍ચે તમામ પક્ષોની દલીલો સાંભળ્‍યા બાદ આ કેસ સાથે જોડાયેલી તમામ જિજ્ઞાસાઓ અને તપાસની માંગ કરતી અરજીઓને ફરાગ પડાડી દીધી છે. અદાલતના આ ચુકાદાથી લાંબા સમયથી ચાલી આવતા આ વિવાદાસ્‍પદ કાનૂની વિવાદમાં નેતાઓને મોટી કાનૂની રાહત મળી છે, જો કે આ મામલો અગાઉથી જ દેશભરમાં રાજકીય ચર્ચાના કેન્‍દ્રમાં રહ્યો છે.