નવી દિલ્હી : કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા બાદ કોકરોચ જનતા પાર્ટી (CJP) એ દિલ્હીના ઐતિહાસિક જંતર-મંતર ખાતેથી પોતાનો વિરોધ પ્રદર્શન સત્તાવાર રીતે સમેટી લીધો હતો. પરંતુ આ આંદોલન શાંત થાય તે પહેલા જ ત્યાં યુવાઓનો નવો ગરમાવો જોવા મળી રહ્યો છે. CJP આંદોલનમાં મુખ્ય ભૂમિકા ભજવનારા 'Gen Z' (આજની યુવા પેઢી) વિદ્યાર્થીઓ ફરી એકવાર હાથમાં પ્લેકાર્ડ અને બેનરો લઈને જંતર-મંતર પર વિરોધ પ્રદર્શન કરવા એકઠા થઈ ગયા છે. દેશભરના ખૂણે-ખૂણેથી આવેલા આ યુવાનોના ગૂંજતા સૂત્રોચ્ચારથી રાજધાનીનું રાજકારણ ફરી ગરમાયું છે.

'અટકાયતમાં લેવાયેલા વિદ્યાર્થીઓને તુરંત મુક્ત કરો'

આ વખતે જંતર-મંતર પર વિરોધ પ્રદર્શન કરી રહેલા વિદ્યાર્થીઓ સીધા CJP સાથે જોડાયેલા નથી, પરંતુ તેઓ 'યુવા દિશા વિદ્યાર્થી સંગઠન'ના બેનર હેઠળ આંદોલન કરી રહ્યા છે. વિદ્યાર્થીઓની મુખ્ય માંગણી એ છે કે આંદોલન દરમિયાન પોલીસ દ્વારા અટકાયતમાં લેવાયેલા તમામ વિદ્યાર્થીઓને વહેલી તકે મુક્ત કરવામાં આવે. તે સિવાય, પ્રદર્શનકારીઓનો જે પણ પોલીસ ડેટાબેઝ કે રેકોર્ડ એકત્રિત કરવામાં આવ્યો છે તેને સંપૂર્ણપણે કાઢી નાખવામાં આવે અને વિદ્યાર્થીઓ પર નોંધાયેલી તમામ FIR રદ કરવામાં આવે.

'લાઠીચાર્જથી દેશનો દરેક ખૂણો જંતર-મંતર બની ગયો'

વિરોધ પ્રદર્શનમાં ભાગ લઈ રહેલા એક વિદ્યાર્થીએ આક્રોશ વ્યક્ત કરતા જણાવ્યું હતું કે, "અમે છેલ્લા ૩૬ દિવસથી રસ્તા પર છીએ. સરકારની નીતિ એવી રહી છે કે પહેલા વિદ્યાર્થીઓ પર બળપ્રયોગ કરવો, લાઠીચાર્જ કરવો અને પછી રાજીનામું આપવું! બિહાર, આસામ, પશ્ચિમ બંગાળ અને મુંબઈથી આવેલા વિદ્યાર્થીઓ આજે પણ એકજૂથ થઈને ઊભા છે. સરકારી લાઠીચાર્જે આખા દેશના દરેક ખૂણાને એક નવું જંતર-મંતર બનાવી દીધું છે. અમારો સિદ્ધાંત સ્પષ્ટ છે – વિદ્યાર્થીઓને ગુનાહિત માનવાનું અને ધમકાવવાનું બંધ કરો."

બીજા મોટા આંદોલનની અપાઈ ચેતવણી

બિહાર, પશ્ચિમ બંગાળ, આસામ અને દિલ્હીમાં વિદ્યાર્થીઓ પર થયેલી પોલીસ કાર્યવાહી સામે CJP એ પણ કડક વાંધો ઉઠાવ્યો છે. પાર્ટીના રાષ્ટ્રીય પ્રવક્તા આશુતોષ રંકાએ સોશિયલ મીડિયા પ્લેટફોર્મ 'X' પર પોસ્ટ કરીને કેન્દ્રીય મંત્રીઓ જે.પી. નડ્ડા અને ડૉ. જિતેન્દ્ર સિંહ પર કરારના ભંગનો આરોપ લગાવ્યો હતો. તેમણે સ્પષ્ટ ચેતવણી આપી છે કે જો પોલીસ દ્વારા વિદ્યાર્થીઓ અને પ્રદર્શનકારીઓ સામેની કાર્યવાહી તાત્કાલિક અસરથી રોકવામાં નહીં આવે, તો સમગ્ર દેશમાં ફરી એકવાર મોટું અને ઉગ્ર આંદોલન છેડવામાં આવશે.