જમ્મુ:પવિત્ર શ્રાવણ માસ પૂર્વે જ ધાર્મિક આસ્થાના પ્રતીક સમાન બાબા અમરનાથની યાત્રાનો વિધિવત અને આધ્યાત્મિક પ્રારંભ થઈ ચૂક્યો છે. જમ્મુ-કાશ્મીરના ઉપરાજ્યપાલ મનોજ સિંહાએ સોમવારે વહેલી સવારે પવિત્ર ગુફામાં બાબા બર્ફાનીની પ્રથમ વિધિવત પૂજા અને આરતી ઉતારીને આ વર્ષની અમરનાથ યાત્રાના મંગળ શ્રીગણેશ કર્યા છે. આ પાવન અવસરે તેમણે સમગ્ર દેશવાસીઓની સુખ-સમૃદ્ધિ, શાંતિ, ઉત્તમ સ્વાસ્થ્ય અને કલ્યાણ માટે પ્રાર્થના કરી હતી. દર વર્ષની જેમ આ વર્ષે પણ શ્રાઇન બોર્ડ દ્વારા જેઠ સુદ પૂનમ (જ્યેષ્ઠ પૂર્ણિમા) ના પવિત્ર અવસરે ગુફામાં પ્રથમ પૂજાનું વિશેષ આયોજન કરવામાં આવ્યું હતું.

૫૭ દિવસની યાત્રા રક્ષાબંધનના દિવસે સંપન્ન થશે:

આ વર્ષે બાબા અમરનાથની પવિત્ર યાત્રા આગામી ૩ જુલાઈથી સત્તાવાર રીતે શરૂ થઈને ૨૮ ઓગસ્ટના રોજ રક્ષાબંધનના પવિત્ર દિવસે સંપન્ન થશે. કુલ ૫૭ દિવસ સુધી ચાલનારી આ વાર્ષિક યાત્રા દર વર્ષની જેમ આ વર્ષે પણ બંને પરંપરાગત માર્ગો એટલે કે પહેલગામ માર્ગ અને બાલટાલ માર્ગ પરથી એકસાથે સંચાલિત કરવામાં આવશે. ઉપરાજ્યપાલે દેશભરમાંથી મોટી સંખ્યામાં શ્રદ્ધાળુઓને બાબા બર્ફાનીના દિવ્ય દર્શનનો લાભ લેવા માટે ભાવભર્યું આમંત્રણ આપ્યું છે.

ચુસ્ત સુરક્ષા અને મજબૂત ઇન્ફ્રાસ્ટ્રક્ચર સાથે તંત્ર સજ્જ:

યાત્રાના સફળ અને શાંતિપૂર્ણ સંચાલન માટે જમ્મુ-કાશ્મીર પ્રશાસન, શ્રી અમરનાથજી શ્રાઇન બોર્ડ, ભારતીય સેના, સ્થાનિક પોલીસ, અર્ધલશ્કરી દળો, સ્થાનિક સમુદાય, સેવા પ્રદાતાઓ અને સ્વયંસેવકો સંપૂર્ણ સમન્વય અને ટીમ ભાવના સાથે કાર્ય કરી રહ્યા છે. આ વર્ષે યાત્રાના બંને રૂટ પર પાયાની માળખાગત સુવિધાઓને વધુ મજબૂત અને આધુનિક બનાવવામાં આવી છે. શ્રદ્ધાળુઓની સુવિધા માટે વહીવટી તંત્ર દ્વારા ટ્રાન્સપોર્ટ, મેડિકલ અને રહેવા-જમવાની વ્યવસ્થાઓમાં વ્યાપક સુધારા કરવામાં આવ્યા છે જેથી તમામ ભક્તોને સુરક્ષિત અને યાદગાર અનુભવ મળી રહે.

ઉચ્ચ વહીવટી અને પોલીસ અધિકારીઓ રહ્યા ઉપસ્થિત:

પવિત્ર ગુફા ખાતે આયોજિત આ પ્રથમ પૂજાના ભક્તિમય માહોલમાં જમ્મુ-કાશ્મીરના પોલીસ મહાનિદેશક નલિન પ્રભાત, શ્રી અમરનાથજી શ્રાઇન બોર્ડના મુખ્ય કાર્યકારી અધિકારી મંદીપ કુમાર ભંડારી, કાશ્મીરના ડિવિઝનલ કમિશનર અંશુલ ગર્ગ તેમજ કાશ્મીરના આઈજી પોલીસ વીકે બિરદી સહિત સૈન્ય, પોલીસ અને સિવિલ પ્રશાસનના અનેક વરિષ્ઠ અધિકારીઓ ખાસ ઉપસ્થિત રહ્યા હતા. સ્થાનિક લોકોના સહયોગથી સમગ્ર તંત્ર આગામી ૩ જુલાઈથી શ્રદ્ધાળુઓના પ્રથમ જથ્થાને આવકારવા માટે સંપૂર્ણપણે સજ્જ થઈ ગયું છે.