વોશિંગ્ટન, તા. ૩૦ : અમેરિકાના વિદેશમંત્રી માર્કો રૂબિયોએ પ્રથમ વખત પાસપોર્ટ મેળવવાની સમગ્ર પ્રક્રિયા ઑનલાઇન કરવાની જાહેરાત કરી છે. નવી વ્યવસ્થા હેઠળ અરજદાર સુરક્ષિત સરકારી ઓળખ દ્વારા પોતાની અગાઉથી ઉપલબ્ધ વિગતો મેળવી શકશે અને એક જ માહિતી વારંવાર ભરવાની જરૂર નહીં રહે.

અરજદાર મોબાઇલથી પોતાનો નવો ફોટો ખેંચી શકશે અથવા ઉપકરણમાં રહેલો ફોટો મૂકી શકશે. પાસપોર્ટમાં ફોટો કેવો દેખાશે તેનો પૂર્વાવલોકન પણ મળશે. અરજીની ફી ઑનલાઇન ચૂકવ્યા પછી પાસપોર્ટની સ્થિતિ—અરજી મળી, પ્રક્રિયામાં છે કે પૂર્ણ થઈ—તે તાત્કાલિક જોઈ શકાશે. અંદાજિત પહોંચ તારીખ પણ દર્શાવવામાં આવશે.

રૂબિયોના જણાવ્યા પ્રમાણે આગામી વર્ષથી પ્રથમ પાસપોર્ટ માટે સંપૂર્ણ ઑનલાઇન અરજીની સુવિધા શરૂ થશે. ૨૦૨૭ના અંત સુધી મોટાભાગના અમેરિકનોને પાસપોર્ટ અથવા પાસપોર્ટ કાર્ડ માટે ઘરેથી અરજી કરવાની સુવિધા આપવાનું લક્ષ્ય છે. નવી સેવા કાર્યરત થાય ત્યાં સુધી પ્રથમ પાસપોર્ટ માટે હાલની રૂબરૂ અરજી પ્રક્રિયા ચાલુ રહેશે.