ચંદીગઢ, તા. ૬ : પંજાબમાં આ વર્ષે સ્વાઇન ફ્લૂથી પ્રથમ શંકાસ્પદ મૃત્યુ નોંધાયું છે. મૃતક દર્દીનો સ્વાઇન ફ્લૂનો તપાસ અહેવાલ હકારાત્મક આવ્યો હતો, પરંતુ તે અગાઉથી ફેફસાંની ગંભીર બીમારી સહિત અનેક આરોગ્ય સમસ્યાઓથી પીડાતો અને તેની રોગપ્રતિકારક શક્તિ નબળી હોવાનું આરોગ્ય અધિકારીઓએ જણાવ્યું છે.

મૃત્યુનું ચોક્કસ કારણ સ્વાઇન ફ્લૂ જ હતું કે અન્ય બીમારીઓ જવાબદાર હતી તે નક્કી કરવા આરોગ્યલક્ષી તપાસ કરાશે. રાજ્યના આરોગ્ય વિભાગના આંકડા પ્રમાણે અત્યાર સુધીમાં ૨૨૦ દર્દીઓમાં એચ-૧-એન-૧ વિષાણુની પુષ્ટિ થઈ છે. લુધિયાણામાં સર્વાધિક ૭૨, સાહિબજાદા અજિતસિંહ નગરમાં ૩૬, પટિયાલામાં ૧૬, મોગામાં ૧૧ અને જલંધરમાં ૧૦ દર્દીઓ નોંધાયા છે. આરોગ્ય વિભાગે તાવ, ઉધરસ અને શ્વાસ લેવામાં તકલીફ જેવા લક્ષણો જણાય તો તાત્કાલિક તપાસ કરાવવા અપીલ કરી છે.