ભુવનેશ્વર: ઓડિશામાં સર્જાયેલી પૂરની ગંભીર પરિસ્થિતિ વચ્ચે હીરાકુડ ડેમમાંથી છોડવામાં આવેલું વધારાનું પાણી રવિવારે કટક નજીક મુંડાલી પહોંચી ગયું છે, જેના કારણે મહાનદીનું જળસ્તર અચાનક વધી ગયું છે. જળ સંસાધન વિભાગના જણાવ્યા અનુસાર, મુંડાલી ખાતે પાણીનું સ્તર વધીને ૫.૭૩ લાખ ક્યુસેક સુધી પહોંચી ગયું છે, જોકે નદીના નીચલા પ્રવાહના વિસ્તારોમાં હાલમાં કોઈ મોટો ખતરો નથી પરંતુ સાવચેતીના ભાગરૂપે ૧૦ દરિયાકાંઠાના જિલ્લાઓને હાઇ એલર્ટ પર રાખવામાં આવ્યા છે.

ઘટનાની વિગતો મુજબ, હીરાકુડ ડેમના ૨૨ દરવાજા ખોલીને મોટા પ્રમાણમાં પાણી છોડવામાં આવ્યા બાદ મહાનદી બેસિનના ખોરધા, કટક, પુરી, કેન્દ્રાપરા અને જગતસિંહપુર સહિતના ડાઉનસ્ટ્રીમ વિસ્તારોમાં નુકસાન થવાની સંભાવના વ્યક્ત કરવામાં આવી છે. જળ સંસાધન વિભાગના એન્જિનિયર-ઇન-ચીફ દિલીપ કુમાર રાઉતે જણાવ્યું હતું કે પૂરનો સૌથી ખતરનાક તબક્કો પસાર થઈ ગયો છે અને જો હવે ભારે વરસાદ ન પડે તો સ્થિતિ નિયંત્રણમાં રહી શકે છે. બીજી તરફ, હવામાન વિભાગે ૨૧ જિલ્લાઓમાં ભારે પવન અને વીજળી સાથે વરસાદની ચેતવણી જારી કરી છે.

અગાઉ ઉત્તર ઓડિશામાં સાલંદી, જલકા, બુધબલંગા, વૈતરણી અને બ્રહ્માણી નદીઓમાં પૂરના પાણી ફરી વળવાથી આઠ લાખથી વધુ લોકો પ્રભાવિત થયા છે અને અનેક ગામડાઓ હજુ પણ પાણીમાં ડૂબેલા છે. મુખ્યમંત્રી મોહન ચરણ માઝીએ પરિસ્થિતિની ગંભીરતાને ધ્યાનમાં રાખીને અસરગ્રસ્ત વિસ્તારોમાં રાહત અને પુનર્વસન કાર્યોને ઝડપી બનાવવા આદેશ આપ્યો છે તેમજ કેબિનેટ મંત્રીઓને બચાવ કામગીરીની દેખરેખ સોંપી છે.

રાજ્ય સરકાર અને સ્થાનિક પ્રશાસન દ્વારા પૂરગ્રસ્ત વિસ્તારોમાં ફસાયેલા નાગરિકોને સુરક્ષિત સ્થળે ખસેડવાની સાથે પીવાનાં પાણી, ખોરાક અને તબીબી સહાય પૂરી પાડવાની કામગીરી યુદ્ધના ધોરણે હાથ ધરવામાં આવી રહી છે.