ગડચિરોલી : પડોશી રાજ્ય છત્તીસગઢમાં પડેલા ભારે વરસાદના કારણે મહારાષ્ટ્રના ગઢચિરોલી જિલ્લાના ભામરાગઢ વિસ્તારમાં જળબંબાકારની ભારે કટોકટી સર્જાઈ છે. પૂરના પાણી ઝડપથી ઘૂસી જતાં નીચાણવાળા વિસ્તારો અને વસાહતો પર ભારે જોખમ ઊભું થયું હતું. પરિસ્થિતિની ગંભીરતાને ધ્યાનમાં રાખીને વહીવટીતંત્ર દ્વારા તાકીદે હાથ ધરાયેલા બચાવ અભિયાનમાં પૂરગ્રસ્ત વિસ્તારોમાંથી લગભગ ૫૨૫ લોકોને સુરક્ષિત સ્થળોએ ખસેડવામાં આવ્યા છે. શનિવારે પૂરના પાણી ધીમે ધીમે ઓસરવાનું શરૂ થતાં સ્થિતિ થોડી સુધરી રહી છે, પરંતુ તંત્ર દ્વારા હજુ પણ નદી-નાળા કિનારે રહેતા લોકોને સતર્ક રહેવાની અપીલ કરવામાં આવી છે.

ગઢચિરોલીના કલેક્ટર અવિશ્યંત પાંડાના માર્ગદર્શન અને તહસીલદાર કિશોર બાગડેના નેતૃત્વમાં ગુરુવારે બપોરથી શરૂ થયેલું સ્થળાંતર અભિયાન મોડી રાત સુધી સતત કાર્યરત રહ્યું હતું. પૂરગ્રસ્ત ગામોના પાણીમાં ઘેરાયેલા ઘરો અને સંપત્તિઓને થયેલા ભારે નુકસાનના દ્રશ્યો સામે આવ્યા છે. તંત્ર દ્વારા નીચાણવાળા વિસ્તારોમાં સતત નજર રાખવામાં આવી રહી છે જેથી કોઈપણ અનિચ્છનીય ઘટનાને ટાળી શકાય.

SDRFની સાહસિક કામગીરી: પૂરના પાણી વચ્ચે હોડી મારફતે દર્દીઓનું રેસ્ક્યૂ

આ પૂરની કટોકટી વચ્ચે સ્ટેટ ડિઝાસ્ટર રિસ્પોન્સ ફોર્સ (SDRF) અને સ્થાનિક ટીમોએ અદ્ભુત માનવતા અને સાહસનું ઉદાહરણ પૂરું પાડ્યું હતું. ભામરાગડ-આલાપલ્લી માર્ગ પૂરના કારણે સંપૂર્ણપણે બંધ થઈ જતાં તાત્કાલિક સારવારની જરૂર હોય તેવા બે ગંભીર દર્દીઓને SDRF ટીમે હોડી મારફતે હેમલકાસા પહોંચાડ્યા હતા અને ત્યાંથી એમ્બ્યુલન્સ દ્વારા આહેરી સબ-ડિસ્ટ્રિક્ટ હોસ્પિટલમાં ખસેડ્યા હતા.

આ ઉપરાંત, બિનાગોંડા આશ્રમ શાળામાં અભ્યાસ કરતી એક બીમાર વિદ્યાર્થિનીને પૂરના ધસમસતા પ્રવાહવાળા ગુંડેનુર નાળામાંથી સુરક્ષિત રીતે પાર કરાવીને લાહેરી સ્થિત પ્રાથમિક આરોગ્ય કેન્દ્રમાં સારવાર અર્થે પહોંચાડવામાં આવી હતી. વહીવટીતંત્ર દ્વારા સ્થાનિક રહીશોને પૂરગ્રસ્ત રસ્તાઓ, પુલો કે વહેતા પાણીમાંથી પસાર ન થવા માટે કડક ચેતવણી આપવામાં આવી છે.