​દુબઈ  : સંયુક્ત આરબ અમીરાત (UAE) ની તપાસ એજન્સીઓ દ્વારા કરવામાં આવેલા અત્યંત ચોંકાવનારા ખુલાસા મુજબ, 'ફ્લાયદુબઈ' (FlyDubai) એરલાઇન્સના એક કો-પાયલટે ઈઝરાયેલના સૌથી મોટા અને વ્યસ્ત એરપોર્ટ બેન ગુરિયન (Ben Gurion Airport) ના પેસેન્જર ટર્મિનલ સાથે વિમાન અથડાવીને હજારો લોકોના જીવ લેવાનું ભયાનક આતંકવાદી કાવતરું ઘડ્યું હતું. સદ્નસીબે, વિમાનમાં સવાર કેપ્ટન, ક્રૂ મેમ્બર્સ અને સાહસિક મુસાફરોના સમયસૂચકતા અને શૌર્યને કારણે આ મોટી દુર્ઘટના ટળી હતી.

​કોકપિટમાં ઇમરજન્સી કુહાડી વડે કેપ્ટન પર હુમલો
​તપાસકર્તાઓના જણાવ્યા અનુસાર, ૩૦ સપ્ટેમ્બરના રોજ દુબઈથી તેલ અવીવ જઈ રહેલી ફ્લાઇટ FZ1073 માં આ ઘટના બની હતી. ૨૯ વર્ષીય ઓમાની કો-પાયલટ હમામ અલ-હમ્મામી (Hamam al-Hammami) એ જોર્ડનના હવાઈ ક્ષેત્રમાં વિમાન ઓટો-પાયલટ મોડ પરથી હટાવી દીધું હતું. ત્યારબાદ તેણે કોકપિટમાં રાખેલી ઇમરજન્સી કુહાડી (Emergency Axe) વડે ભારતીય મૂળના મુખ્યા પાયલટ (કેપ્ટન સ્મિત મચ્છાર) પર હિંસક હુમલો કરી તેને ગંભીર રીતે ઘાયલ કર્યા હતા.

​મુસાફરો અને ક્રૂ મેમ્બર્સનું બહાદુરીભર્યું સાહસ
​કેપ્ટને ગંભીર ઈજાઓ હોવા છતાં કોકપિટનો દરવાજો ખોલવામાં સફળતા મેળવી હતી. ઓફ-ડ્યુટી મુસાફરી કરી રહેલા અન્ય એક પાયલટ અને વિમાનના કેબિન ક્રૂ તેમજ કેટલાક મુસાફરોએ તાત્કાલિક કોકપિટમાં ધસી જઈને આતંકવાદી માનસિકતા ધરાવતા કો-પાયલટને કાબૂમાં લીધો હતો. ત્યારબાદ ફ્લાઇટમાં સવાર બીજા પાયલટોએ વિમાનનો કબજો મેળવી સાઉદી અરેબિયાના તબૂક એરપોર્ટ પર ઈમરજન્સી લેન્ડિંગ કરાવી તમામ મુસાફરોનો જીવ બચાવ્યો હતો.

​કાવતરા પાછળનો હેતુ અને ઓસ્ટ્રેલિયામાં રેડિકલાઇઝેશન
​યુએઈના એટર્ની જનરલના અહેવાલ મુજબ:

​૯/૧૧ હુમલાથી પ્રેરિત: આરોપીએ સ્વીકાર્યું હતું કે તેને અમેરિકામાં થયેલા ૧૧ સપ્ટેમ્બર ૨૦૦૧ના આતંકવાદી હુમલા પરથી આ રીતે વિમાન અથડાવવાનો વિચાર આવ્યો હતો.

​ઓસ્ટ્રેલિયામાં અભ્યાસ: ૨૦૧૫ થી ૨૦૧૭ દરમિયાન ઓસ્ટ્રેલિયાના મેલબોર્નમાં એન્જિનિયરિંગનો અભ્યાસ કરતી વખતે તે કટ્ટરપંથી સાહિત્ય અને આતંકવાદી વિચારધારાના સંપર્કમાં આવ્યો હતો.

​પૂર્વ આયોજિત પ્લાનિંગ: ઈઝરાયેલ જતી ફ્લાઇટો રન કરતી હોવાને કારણે જ તેણે ફ્લાયદુબઈમાં નોકરી મેળવી હતી. તે અગાઉ પણ તેલ અવીવની બે ફ્લાઇટમાં રૂટ અને એરપોર્ટની રેકી (તપાસ) કરવા માટે જઈ ચૂક્યો હતો.

​એરલાઇન્સ સેફ્ટી અને સુરક્ષા સામે ગંભીર સવાલો
​આરોપી અગાઉ 'ઓમાન એર' માં કામ કરતો હતો, જ્યાં તેની કટ્ટરપંથી પ્રવૃત્તિઓને કારણે તેને ઉડ્ડયનમાંથી હટાવી દેવામાં આવ્યો હતો. તેમ છતાં તે ફ્લાયદુબઈની સુરક્ષા તપાસ પાસ કરીને કો-પાયલટ બની ગયો, જેનાથી એરલાઇન્સની પાયલટ રિક્રૂટમેન્ટ સ્ક્રીનિંગ પ્રક્રિયા પર ગંભીર સવાલો ઊભા થયા છે. ઈઝરાયેલના વડાપ્રધાન બેન્જામિન નેતન્યાહુએ પણ વિદેશી નાગરિક પાયલટોના સિક્યોરિટી પ્રોટોકોલની સમીક્ષા કરવાનો આદેશ આપ્યો છે.