નવી દિલ્હી: દેશભરમાં આગામી સપ્તાહે યુનાઇટેડ ફોરમ ઓફ બેંક યુનિયન્સ (UFBU) દ્વારા ૩ દિવસની દેશવ્યાપી બેંક હડતાળની જાહેરાત કરવામાં આવી છે. અઠવાડિયે ૫ દિવસના કામકાજ (5 Days Working Demand) ની માંગણીને લઈને બોલાવાયેલી આ હડતાળ ૨૮ સપ્ટેમ્બર (સોમવાર) થી શરૂ થઈને ૩૦ સપ્ટેમ્બર (બુધવાર) સુધી ચાલશે. આ હડતાળના કારણે સામાન્ય નાગરિકો અને બેંક ગ્રાહકોને કોઈ મુશ્કેલીનો સામનો ન કરવો પડે તે માટે રિઝર્વ બેંક ઓફ ઇન્ડિયા (RBI) અને નાણા મંત્રાલય દ્વારા એક મહત્વપૂર્ણ નિર્ણય લેવામાં આવ્યો છે.

આ નિર્ણય અંતર્ગત હડતાળ શરૂ થાય તે પહેલાના દિવસે એટલે કે ૨૭ સપ્ટેમ્બર ૨૦૨૬ના રવિવારના દિવસે પણ દેશભરની તમામ બેંક શાખાઓ સામાન્ય દિવસોની જેમ ખુલ્લી રહેશે.

રવિવારે બેંકો, ATM અને કરન્સી ચેસ્ટ ચાલુ રહેશે:
સાપ્તાહિક રજાઓ (૨૬ અને ૨૭ સપ્ટેમ્બર) અને ત્યારબાદ ૩ દિવસની હડતાળ મળીને સળંગ ૫ દિવસ સુધી બેંકિંગ સેવાઓ બંધ રહેવાની શક્યતા હતી. આ સ્થિતિને ધ્યાનમાં રાખીને કેન્દ્રીય બેંકે તાત્કાલિક પગલાં ભર્યા છે. નાણા મંત્રાલય દ્વારા સ્પષ્ટ કરવામાં આવ્યું છે કે તમામ પબ્લિક સેક્ટર બેંકો અને પ્રાદેશિક ગ્રામીણ બેંકો ૨૭ સપ્ટેમ્બરે રવિવાર હોવા છતાં રાબેતા મુજબ ખુલ્લી રહેશે. રિઝર્વ બેંકે તમામ બેંક શાખાઓ, ઓફિસો, એટીએમ-લિંક્ડ બ્રાન્ચો અને કરન્સી ચેસ્ટને રવિવારે પણ સંપૂર્ણ રીતે કાર્યરત રાખવા માટે મંજૂરી આપી દીધી છે.

સરકારની હડતાળ પાછી ખેંચવા અપીલ:
સરકાર અને બેંક પ્રબંધન દ્વારા યુનિયનોને આ પ્રસ્તાવિત હડતાળ ટાળવા માટે સતત અપીલ કરવામાં આવી રહી છે. સરકારનું કહેવું છે કે ગ્રાહકોની સુવિધા અને કલ્યાણ તેમની સર્વોચ્ચ પ્રાથમિકતા છે, જેના માટે જરૂરી બેંકિંગ સેવાઓ વગર કોઈ અડચણે ચાલુ રહે તે દિશામાં આ પગલાં લેવાયા છે.

આ સેવાઓ પર પડશે હડતાળની અસર:
સરકારી બેંકો દ્વારા પોતાના ગ્રાહકોને મેસેજ અને એલર્ટ મોકલીને જરૂરી કામકાજ હડતાળ પહેલાં જ પતાવી લેવા સલાહ આપવામાં આવી છે. ૨૮ થી ૩૦ સપ્ટેમ્બર દરમિયાન ૩ દિવસની હડતાળના કારણે બેંક શાખાઓમાં કેશ જમા-ઉપાડ, ચેક ક્લિયરિંગ સંબંધિત કામો, કેવાયસી (KYC) અપડેટ અને મહત્વપૂર્ણ દસ્તાવેજો જમા કરાવવા જેવી સેવાઓ ખોરવાઈ શકે છે.