નવી દિલ્હી : વડાપ્રધાન નરેન્દ્રભાઈ મોદીએ તાજેતરમાં કરેલી ઇંધણ બચાવવાની અપીલ બાદ ભારત સરકારના પર્સનલ અને ટ્રેનિંગ વિભાગ હેઠળ કાર્યરત કેપેસિટી બિલ્ડિંગ કમિશન (સીબીસી) દ્વારા દેશમાં હાલની તાજેતરની ગતિવિધિઓને ધ્યાનમાં રાખીને સંસ્થાના આંતરિક વહીવટ માટે અત્યંત મહત્વપૂર્ણ સૂચનાઓ જાહેર કરવામાં આવી છે. ૧૨ મે ૨૦૨૬ના રોજ બહાર પાડવામાં આવેલા એક સત્તાવાર ઓફિસ મેમોરેન્ડમ અનુસાર કમિશનના કામકાજની પદ્ધતિમાં તાત્કાલિક અસરથી મોટા ફેરફારો લાગુ કરવામાં આવ્યા છે જે અંતર્ગત કર્મચારીઓને ઓફિસ કાર્યમાં રાહત આપવાની સાથે કેટલાક કડક નિયંત્રણો પણ લાદવામાં આવ્યા છે.

કેપેસિટી બિલ્ડિંગ કમિશનના અન્ડર સેક્રેટરી ન્ગુલખોસાત દ્વારા જારી કરાયેલા આ આદેશમાં જણાવાયું છે કે તમામ પિલર હેડ્સ તેમના હેઠળના સંસાધનો અને સ્ટાફ માટે એક રોસ્ટર તૈયાર કરી શકશે. આ રોસ્ટર મુજબ કર્મચારીઓને અઠવાડિયામાં વધુમાં વધુ બે દિવસ સુધી વર્ક ફ્રોમ હોમ એટલે કે ઘરેથી કામ કરવાની પરવાનગી આપી શકાશે. જોકે આ વ્યવસ્થામાં એ શરત રાખવામાં આવી છે કે કોઈપણ સંજોગોમાં ઓફિસમાં ઓછામાં ઓછો ૫૦ ટકા સ્ટાફ હાજર રહેવો જોઈએ. આ તૈયાર કરાયેલું રોસ્ટર એડમિન વિભાગ સાથે શેર કરવાનું રહેશે. જે કર્મચારીઓને ઘરેથી કામ કરવાની મંજૂરી આપવામાં આવે તેમણે ટેલિફોન પર ઉપલબ્ધ રહેવું પડશે અને જો જરૂર જણાય તો કોઈપણ સમયે ઓફિસમાં હાજર થવા માટે તૈયાર રહેવું પડશે. પિલર હેડ્સે એ પણ સુનિશ્ચિત કરવાનું રહેશે કે આ સૂચનાઓનું પાલન કરવાની સાથે તેમને સોંપવામાં આવેલા વિવિધ કાર્યો સમયસર પૂર્ણ થાય.

આ ઉપરાંત કમિશન દ્વારા પ્રવાસ અને જાહેર કાર્યક્રમો પર પણ રોક લગાવી દેવામાં આવી છે. પિલર હેડ્સને વિનંતી કરવામાં આવી છે કે તેઓ દિલ્હીની અંદર કે દિલ્હીની બહાર કોઈપણ પ્રકારના શારીરિક કાર્યક્રમો અથવા વર્કશોપનું આયોજન કરવાની ભલામણ ન કરે. એટલું જ નહીં કોઈપણ કર્મચારી કે સંસાધનને દિલ્હીની બહાર પ્રવાસ માટે મોકલવામાં આવશે નહીં. તેના બદલે તમામ જરૂરી મીટિંગો વિડિયો કોન્ફરન્સિંગ અથવા ઓનલાઇન મોડ દ્વારા યોજવા માટે તમામ પ્રયાસો કરવા જણાવાયું છે.

આ આદેશમાં સ્પષ્ટતા કરવામાં આવી છે કે જો વહીવટી આધારો પર ઉપરોક્ત સૂચનાઓમાં કોઈપણ પ્રકારનું વિચલન કે ફેરફાર કરવાની જરૂર જણાય તો તે માટે સીબીસીના સેક્રેટરીની પૂર્વ મંજૂરી લેવી અનિવાર્ય રહેશે. આ તમામ સૂચનાઓ સંબંધિત દરેક પક્ષો માટે તાત્કાલિક અસરથી લાગુ કરવામાં આવી છે અને આગામી આદેશો ન મળે ત્યાં સુધી આ વ્યવસ્થા અમલમાં રહેશે તેમ ન્ગુલખોસાત દ્વારા જણાવવામાં આવ્યું છે. આ પત્રની નકલ તમામ પિલર હેડ્સ અને સીબીસીમાં કામ કરતા તમામ કર્મચારીઓને પાઠવી દેવામાં આવી છે.