પેરિસ, તા.૧૩: ફ્રાન્સના રાજકીય ગલિયારાઓમાં અત્યારે એક અણધાર્યા વિવાદે જોર પકડ્યું છે. ફ્રેન્ચ મીડિયાના અહેવાલો અનુસાર, રાષ્ટ્રપતિ ઇમેન્યુઅલ મેક્રોન અને જાણીતી ઈરાની-ફ્રેન્ચ અભિનેત્રી ગોલશિફ્ટેહ ફરાહાની વચ્ચેના કથિત 'પ્લેટોનિક સંબંધો' (શારીરિક આકર્ષણ વગરના ગાઢ માનસિક સંબંધો) એ દેશભરમાં ચર્ચા જગાવી છે. અહેવાલોમાં દાવો કરવામાં આવ્યો છે કે ફ્રાન્સના પ્રથમ મહિલા બ્રિજિટ મેક્રોનને જ્યારે આ અંગત વાતચીતની જાણ થઈ, ત્યારે રાષ્ટ્રપતિ દંપતીના લગ્નજીવનમાં તણાવની સ્થિતિ સર્જાઈ હતી. જોકે, એલિસી પેલેસ (રાષ્ટ્રપતિ ભવન) કે અભિનેત્રી તરફથી હજુ સુધી કોઈ સત્તાવાર પુષ્ટિ મળી નથી.

કોણ છે ગોલશિફ્ટેહ ફરાહાની?

આ વિવાદને કારણે ઈન્ટરનેટ પર જે નામ સૌથી વધુ સર્ચ થઈ રહ્યું છે તે છે ગોલશિફ્ટેહ ફરાહાની. તે માત્ર એક અભિનેત્રી નથી પણ સંઘર્ષનું બીજું નામ છે. ઈરાનના તેહરાનમાં જન્મેલી ૪૨ વર્ષીય ગોલશિફ્ટેહ એક કલાકાર પરિવારમાંથી આવે છે. તેણે માત્ર ૧૪ વર્ષની ઉંમરે અભિનયની શરૂઆત કરી હતી. આંતરરાષ્ટ્રીય સ્તરે તે હોલીવુડની સુપરહિટ ફિલ્મ 'એક્સટ્રેક્શન' (Extraction) અને 'એક્સટ્રેક્શન ૨' માં 'નિક ખાન' તરીકેની શાનદાર ભૂમિકા માટે જાણીતી છે. ૨૦૨૩ માં તેને બર્લિન ફિલ્મ ફેસ્ટિવલમાં જ્યુરી સભ્ય તરીકે પણ પસંદ કરવામાં આવી હતી.

હિજાબનો વિરોધ અને દેશનિકાલ

ગોલશિફ્ટેહની સફર પડકારોથી ભરેલી રહી છે. ૨૦૦૮ માં આંતરરાષ્ટ્રીય ફિલ્મોમાં કામ કરતી વખતે તેણે હિજાબ પહેરવાનો ઇનકાર કર્યો હતો, જેના કારણે તેને ઈરાનમાંથી દેશનિકાલ કરવામાં આવી હતી. ત્યારથી તે પેરિસમાં સ્થાયી થઈ હતી. તે માત્ર ફિલ્મોમાં જ નહીં પણ માનવતાવાદી કાર્યોમાં પણ સક્રિય છે. તે ઈરાનમાં પર્યાવરણ અને ક્ષય રોગ (TB) નાબૂદીના અભિયાનોને સમર્થન આપે છે. હાલમાં તે સ્પેનના ઇબિઝા અને પોર્ટુગલના પોર્ટો વચ્ચે પોતાનો સમય વિતાવે છે.

સમિટ અને અંગત જીવન વચ્ચેનું સંતુલન

એક તરફ જ્યારે રાષ્ટ્રપતિ મેક્રોન ચીન સાથેના વ્યૂહાત્મક સંબંધો અને આંતરરાષ્ટ્રીય મુદ્દાઓમાં વ્યસ્ત છે, ત્યારે બીજી તરફ તેમના અંગત જીવન વિશેની આ અટકળોએ ફ્રાન્સના રાજકારણમાં ગરમાવો લાવી દીધો છે. ફ્રેન્ચ મીડિયા આ બાબતને ખૂબ જ ગંભીરતાથી લઈ રહ્યું છે કારણ કે આ અહેવાલો સીધી રીતે ફર્સ્ટ ફેમિલીના સંબંધો સાથે જોડાયેલા છે. આગામી દિવસોમાં આ મામલે સત્તાવાર સ્પષ્ટતા થાય છે કે કેમ તે જોવું રસપ્રદ રહેશે.