કોલકાતા : પશ્ચિમ બંગાળમાં સત્તા પરિવર્તનની સાથે જ રાજકીય સંઘર્ષ હવે સીધો મિલકતો અને ભ્રષ્ટાચારના મોરચે આવી પહોંચ્યો છે. મુખ્યમંત્રી સુવેન્દુ અધિકારીના નેતૃત્વ હેઠળની વર્તમાન સરકારે વિપક્ષી તૃણમૂલ કોંગ્રેસ (TMC) ના જનરલ સેક્રેટરી અને સાંસદ અભિષેક બેનર્જી તેમજ તેમના નજીકના સહયોગીઓ વિરુદ્ધ અત્યાર સુધીની સૌથી મોટી કાનૂની કાર્યવાહી શરૂ કરી છે. સોમવારે બપોરે કોલકાતા મ્યુનિસિપલ કોર્પોરેશન (KMC) ની એક હાઈ-લેવલ ટીમે હરીશ મુખર્જી રોડ પર આવેલા બેનર્જીના સત્તાવાર નિવાસસ્થાન 'શાંતિ નિકેતન' સહિતની અનેક મિલકતો પર જઈને KMC એક્ટની કલમ ૪૦૧ હેઠળ સત્તાવાર નોટિસો ચોંટાડી દીધી છે, જેનાથી બંગાળના રાજકારણમાં ભારે સનસનાટી મચી ગઈ છે.

કોર્પોરેશનના નિયમો અનુસાર, કલમ ૪૦૧ હેઠળ નોટિસ ત્યારે જ જારી કરવામાં આવે છે જ્યારે નાગરિક સંસ્થાની પૂર્વ મંજૂરી વિના જ કોઈ ઇમારત કે તેનો ભાગ ગેરકાયદેસર રીતે બનાવવામાં આવ્યો હોય. KMC ના એક વરિષ્ઠ અધિકારીએ સ્પષ્ટ સંકેત આપ્યો છે કે આ નોટિસ ભવિષ્યમાં તોડી પાડવાની (Bulldozer Action) કાર્યવાહીનો માર્ગ મોકળો કરે છે. જો તપાસ દરમિયાન નકશા અને બાંધકામમાં ગંભીર ઉલ્લંઘનો બહાર આવશે, તો આ કથિત ગેરકાયદેસર ઇમારતો પર બુલડોઝર પણ ફરી વળશે. નોંધનીય છે કે 'શાંતિનિકેતન' પર લગાવવામાં આવેલી નોટિસ બાદમાં ફાટેલી હાલતમાં મળી આવી હતી.

૪૨ આલીશાન મિલકતો અને કરોડોની ટેક્સ ચોરીની આશંકા

KMC ના નાગરિક મૂલ્યાંકન વિભાગે અભિષેક બેનર્જી અને તેમના પરિવારની સીધી અથવા સહ-માલિકીની અંદાજે ૪૨ હાઈ-પ્રોફાઈલ મિલકતોની ઓળખ કરી છે. વિભાગ હવે એ વાતની ઊંડી તપાસ કરી રહ્યો છે કે આ મિલકતો પર છેલ્લા કેટલાય વર્ષોથી પ્રોપર્ટી ટેક્સ ચૂકવવામાં આવ્યો છે કે કેમ. મુખ્યમંત્રી સુવેન્દુ અધિકારીએ તાજેતરમાં જ એક ભવ્ય રેલી દરમિયાન આ મિલકતોની ચોંકાવનારી વિગતો જાહેર કરતાં જણાવ્યું હતું કે, આ પૈકીની ૧૪ વિવાદાસ્પદ મિલકતો 'લીપ્સ એન્ડ બાઉન્ડ્સ' કંપનીના નામે છે, ૪ મિલકતો ખુદ અભિષેક બેનર્જીના નામે અને ૬ મિલકતો તેમના પિતાના નામે નોંધાયેલી છે. આ ઉપરાંત, તેમના સહયોગીઓ રાજુ લશ્કરની ૧૮, સોના પપ્પુની ૨૪ અને જાવેદ ખાનના પુત્રની ૯૦ મિલકતો પણ હાલમાં કોર્પોરેશનના રડાર પર છે.

વર્ષ ૨૦૧૦ થી KMC પર હતું તૃણમૂલનું રાજ, હવે પાસા પલટાયા

સૌથી રસપ્રદ અને ચોંકાવનારી વાત એ છે કે, જે કોલકાતા મ્યુનિસિપલ કોર્પોરેશન (KMC) નું નાગરિક બોર્ડ વર્ષ ૨૦૧૦ થી સતત તૃણમૂલ કોંગ્રેસના જ ચુસ્ત નિયંત્રણ હેઠળ રહ્યું છે, આજે તે જ તંત્ર દ્વારા તેમના સુપ્રિમોના પરિવાર સામે થઈ રહેલી આ આકરી કાર્યવાહી રાજ્યમાં થયેલા મોટા રાજકીય પરિવર્તન અને સુવેન્દુ સરકારની પકડનો મજબૂત પુરાવો આપે છે.

ટીએમસી લડશે કાનૂની જંગ: બદલાની રાજનીતિનો આક્ષેપ

બીજી તરફ, મુખ્યમંત્રી સુવેન્દુ અધિકારીએ કડક શબ્દોમાં ચેતવણી આપતા જણાવ્યું છે કે, "બંગાળની જનતાની કમાણી લૂંટનારા ભ્રષ્ટ તત્વોને સરકાર કોઈપણ કાળે છોડશે નહીં અને તેમને જેલના સળિયા પાછળ ધકેલીને જ જંપશે." આ દરમિયાન, તૃણમૂલ કોંગ્રેસે આ સમગ્ર ઘટનાક્રમને ભાજપ સરકારની "બદલાની અને દ્વેષપૂર્ણ રાજનીતિ" ગણાવી છે. પક્ષના આંતરિક સૂત્રોના જણાવ્યા અનુસાર, KMC ના આ આકરા વલણથી બેનર્જી પરિવાર ભારે નારાજ છે અને આ મામલે કાયદાકીય રીતે લડી લેવા માટે સુપ્રિમ કોર્ટના વરિષ્ઠ વકીલોની સલાહ લઈ રહ્યો છે તથા તમામ દસ્તાવેજો એકત્રિત કરવામાં આવી રહ્યા છે. હવે જોવાનું એ રહેશે કે કોલકાતાની આ ભવ્ય ઇમારતો પર કાયદાનું બુલડોઝર ચાલે છે કે પછી કોર્ટ આ કાર્યવાહી પર સ્ટે ઓર્ડર આપે છે.