નવી દિલ્હી:  ઓમાનના દરિયાકાંઠે ભારતીય ધ્વજ ધરાવતા એક વ્યાપારી જહાજ (કોમર્શિયલ વેસલ) પર થયેલા હુમલાની ઘટનાને ભારત સરકારે ગુરુવારે સખત શબ્દોમાં વખોડી કાઢી છે. વિદેશ મંત્રાલયે આ હુમલાને 'અસ્વીકાર્ય' ગણાવતા ભારપૂર્વક જણાવ્યું છે કે આંતરરાષ્ટ્રીય જળસીમામાં નાગરિક જહાજો અને ખલાસીઓને સતત નિશાન બનાવવામાં આવી રહ્યા છે તે બાબત અત્યંત ચિંતાજનક અને ખેદજનક છે.

 તમામ ભારતીય ખલાસીઓ સુરક્ષિત:

વિદેશ મંત્રાલય દ્વારા જારી કરવામાં આવેલા સત્તાવાર નિવેદનમાં સ્પષ્ટતા કરવામાં આવી છે કે જહાજ પર સવાર તમામ ભારતીય ક્રૂ મેમ્બર્સ સંપૂર્ણપણે સુરક્ષિત છે. હુમલા બાદ સર્જાયેલી કટોકટીમાં ઓમાનના સત્તાવાળાઓએ તાત્કાલિક સહાય પૂરી પાડી હતી, જેના કારણે તમામ ખલાસીઓને કોઈ પણ ઈજા વગર બચાવી લેવામાં સફળતા મળી છે. ભારત સરકારે આ રેસ્ક્યૂ ઓપરેશનમાં ઓમાન દ્વારા આપવામાં આવેલા સહયોગ બદલ આભાર પણ વ્યક્ત કર્યો છે.

 વ્યાપારી જહાજો પર વધતા હુમલા અંગે ભારતનો કડક સુર:

વિદેશ મંત્રાલયે આ ઘટના અંગે પ્રતિક્રિયા આપતા જણાવ્યું કે, "ગઈકાલે ઓમાનના દરિયાકાંઠે ભારતીય ધ્વજ ધરાવતા જહાજ પર થયેલો હુમલો બિલકુલ અસ્વીકાર્ય છે. અમે એ હકીકતને વખોડીએ છીએ કે વ્યાપારી જહાજો અને નાગરિક ખલાસીઓને સતત નિશાન બનાવવામાં આવી રહ્યા છે." ભારત સરકારે આ મુદ્દે આંતરરાષ્ટ્રીય સ્તરે પણ સુરક્ષા વ્યવસ્થા મજબૂત કરવા પર ભાર મૂક્યો છે જેથી દરિયાઈ વેપાર માર્ગો સુરક્ષિત રહી શકે.

 દરિયાઈ સુરક્ષા માટે વધતો ખતરો:

ઉલ્લેખનીય છે કે, છેલ્લા કેટલાક સમયથી હોર્મુઝની સામુદ્રધુની અને પર્સિયન ગલ્ફની આસપાસના વિસ્તારોમાં કોમર્શિયલ જહાજો પર હુમલાની ઘટનાઓ વધી રહી છે. ભારત આ માર્ગે મોટા પાયે વેપાર અને ઈંધણની આયાત કરતું હોવાથી ભારતીય નૌસેના પણ સતત એલર્ટ પર છે. આ તાજેતરના હુમલા બાદ ભારત સરકાર આ મામલે વધુ કડક વલણ અપનાવી રહી છે અને આંતરરાષ્ટ્રીય સમુદાય સમક્ષ આ પ્રકારના હુમલાઓને અટકાવવા માટે અપીલ કરી છે. તમામ બચાવેલા ખલાસીઓ અત્યારે સુરક્ષિત સ્થળે છે અને તેમને ભારત લાવવાની પ્રક્રિયા હાથ ધરવામાં આવશે.