ઉદયપુર : રાજસ્થાનના ઉદયપુરમાં આવેલા સુપ્રસિદ્ધ ખાટુશ્યામજી મંદિરમાં થયેલી લાખોની ચોરીના મામલે પોલીસે આખરે સફળતા મેળવી છે. ભક્તોની આસ્થા સાથે ખેલ ખેલીને દાનપેટીમાંથી લાખો રૂપિયા ચોરી જનાર ગેંગના બે મુખ્ય સાગરીતોને ચિત્તોડગઢ પોલીસે દબોચી લીધા છે. આ ટોળકીએ માત્ર ઉદયપુર જ નહીં, પરંતુ ચિત્તોડગઢના પ્રખ્યાત મલ્લિનાથ જૈન મંદિરમાં પણ ચોરી કરી હોવાનું તપાસમાં બહાર આવ્યું છે.
સીસીટીવીમાં કેદ થયો ચોરીનો ‘કોથળો’
માવલી-ફતેહનગર રોડ પર આવેલા લાડાણા ગામના ખાટુશ્યામજી મંદિરમાં ગત ૮ માર્ચની રાત્રે ફિલ્મી સ્ટાઈલે ચોરી થઈ હતી. સીસીટીવી ફૂટેજમાં જોઈ શકાય છે કે ચાર જેટલા ચોરો મંદિરમાં ઘૂસ્યા હતા અને દાનપેટીના તાળા તોડીને તેમાંથી અંદાજે ૮ લાખ રૂપિયાથી વધુની રોકડ રકમ કોથળાઓમાં ભરીને ફરાર થઈ ગયા હતા. સવારે જ્યારે પૂજારીએ મંદિરના તાળા તૂટેલા જોયા ત્યારે આ ચોંકાવનારી ઘટના પ્રકાશમાં આવી હતી.
પોલીસની જાળમાં ફસાયા રીઢા ગુનેગારો
ચિત્તોડગઢના એસપી મનીષ ત્રિપાઠીએ જણાવ્યું કે, મંદિરોમાં થતી શ્રેણીબદ્ધ ચોરીઓને રોકવા માટે સ્પેશિયલ ટીમ બનાવવામાં આવી હતી. તપાસ દરમિયાન નિમ્બાહેરાના મિથુલાલ નાયક અને રશ્મિના કન્હૈયા નાયકની ધરપકડ કરવામાં આવી છે. આ બંને આરોપીઓએ ઉદયપુરના ખાટુશ્યામજી મંદિરમાં થયેલી મોટી ચોરીની કબૂલાત કરી લીધી છે. તેમની પૂછપરછમાં ગેંગના અન્ય પાંચ સભ્યોના નામ પણ સામે આવ્યા છે, જેમાં મનીષા નામની એક મહિલાનો પણ સમાવેશ થાય છે.
હજુ પાંચ આરોપીઓ ફરાર
પોલીસના જણાવ્યા અનુસાર, ઘનશ્યામ સાલ્વી, દેવીલાલ રાવત અને રાજુ સહિત અન્ય પાંચ સાગરીતો હજુ પણ પોલીસ પકડથી દૂર છે. આ ગેંગ લાંબા સમયથી મંદિરોને નિશાન બનાવી રહી હતી અને ચોરી કર્યા બાદ અલગ-અલગ શહેરોમાં છુપાઈ જતી હતી. હાલ તો પોલીસે ઝડપાયેલા આરોપીઓના રિમાન્ડ મેળવવાની તજવીજ હાથ ધરી છે, જેથી ચોરીની રોકડ રકમ રિકવર કરી શકાય અને બાકીના ગુનેગારો સુધી પહોંચી શકાય.
આ સફળતા બાદ સ્થાનિક ભક્તો અને મંદિર પ્રશાસને રાહતનો શ્વાસ લીધો છે, જોકે હજુ પણ સંપૂર્ણ રકમ અને બાકીના આરોપીઓ પકડાય તેની રાહ જોવાઈ રહી છે.