શ્રીનગર, તા.૧૭: કેન્દ્ર સરકાર દ્વારા મોટા વેપારી વ્યવહારો પર ૧૫ ઓક્ટોબરથી લાગુ કરાનારા નવી UPI ફી સિસ્ટમ મામલે દેશનું રાજકારણ ગરમાયું છે. કોંગ્રેસ નેતા રાહુલ ગાંધી જ્યાં આ નિર્ણયને ‘મોદી ટેક્સ’ ગણાવીને પાછો ખેંચવાની ઉગ્ર માગ કરી રહ્યા છે, ત્યાં જ ઇન્ડિયા (INDIA) ગઠબંધનમાં સામેલ નેશનલ કોન્ફરન્સના નેતા અને જમ્મુ-કાશ્મીરના મુખ્યમંત્રી ઓમર અબ્દુલ્લાએ કેન્દ્ર સરકારના આ નિર્ણયનું ખુલ્લેઆમ સમર્થન કરીને કોંગ્રેસને મોટો આંચકો આપ્યો છે. ઓમર અબ્દુલ્લાએ સ્પષ્ટપણે જણાવ્યું છે કે વિશાળ ડિજિટલ પેમેન્ટ ઇન્ફ્રાસ્ટ્રક્ચર ચલાવવું અને જાળવવું સસ્તું નથી હોતું, તેમાં મોટો આર્થિક ખર્ચ થાય છે.

કેન્દ્ર સરકારના નવા નિયમ મુજબ, ₹૨,૦૦૦ થી વધુના મોટા વેપારી વ્યવહારો (MDR) પર ૦.૪ ટકા ફી લેવામાં આવશે, જેનો બોજ સામાન્ય ગ્રાહકો કે વ્યક્તિગત (P2P) ટ્રાન્સફર પર નહીં પરંતુ માત્ર મોટા વેપારીઓ અને કંપનીઓ પર જ પડશે. રાહુલ ગાંધીએ વડાપ્રધાન નરેન્દ્ર મોદી પર અમેરિકા સામે નમવાનો અને સામાન્ય ભારતીયો પર બોજ નાખવાનો આરોપ લગાવી આ ટેક્સ રદ કરવા ટ્વીટ કર્યું હતું. જોકે, તેના જવાબમાં ઓમર અબ્દુલ્લાએ પત્રકારો સાથેની વાતચીતમાં કહ્યું કે, “જ્યારે કોઈ સેવા સંપૂર્ણપણે મફત મળે છે, ત્યારે આપણે તેના સાચા મૂલ્યનો અંદાજ લગાવી શકતા નથી. ગ્રાહકો સુરક્ષિત છે અને મોટા કોર્પોરેટ્સ પાસેથી નજીવો ચાર્જ લેવામાં કંઈ ખોટું નથી.”

નોંધનીય છે કે ઓમર અબ્દુલ્લાએ તાજેતરમાં બ્રિક્સ (BRICS) સમિટ અને વિદેશ નીતિ મામલે પણ મોદી સરકારની પ્રશંસા કરી હતી, ત્યારે હવે UPI મુદ્દે પણ કોંગ્રેસના સ્ટેન્ડથી અલગ લાઇન લેતાં વિપક્ષી ગઠબંધનની અંદરના તાલમેલ અને આંતરિક મતભેદો સપાટી પર આવી ગયા છે.