તા. ૧૭ નવેમ્બર ર૦ર૬ વિક્રમ સંવત ર૦૮૩ કારતક સુદ – ૮ મંગળવાર
News of Tuesday, 17th November 2026
સ્ટ્રેટ ઓફ હોર્મુઝમાં ગેસ ટેન્કર પર મિસાઈલ હુમલો: 24 ભારતીય નાવિકોના જીવ તાળવે ચોંટ્યા : જાણો કેવી છે હાલત : કેન્દ્રીય મંત્રી સર્બાનંદ સોનોવાલે આપી માહિતી
પનામા ધ્વજવાળું LPG ટેન્કર ‘તારા ગેસ’ 16 નવેમ્બરે હુમલાનો શિકાર, પહેલા હુમલામાં બધા સુરક્ષિત હોવાનું કહેવાયું, બીજા હુમલા બાદ જહાજ છોડવું પડ્યું, 1 ભારતીય નાવિક લાપતા

નવી દિલ્હી તા.૧૭ : વિશ્વના સૌથી મહત્વના એનર્જી કોરિડોર સ્ટ્રેટ ઓફ હોર્મુઝમાં ફરી મિસાઈલ હુમલાથી ખળભળાટ મચી ગયો છે. પનામા ધ્વજવાળા LPG ટેન્કર ‘તારા ગેસ’ પર મિસાઈલ હુમલો થયો છે, જેમાં 24 ભારતીય સહિત કુલ 25 ક્રૂ મેમ્બર સવાર હતા
16 નવેમ્બરે રાત્રે લગભગ 11 વાગ્યે (1900 UTC) ઓમાનના ખસાબથી લગભગ 7 નોટિકલ માઈલ ઉત્તરમાં આ હુમલો થયો હતો. UK મેરીટાઇમ ટ્રેડ ઓપરેશન્સ (UKMTO)એ એડવાઈઝરી નંબર 208-26માં જણાવ્યું હતું કે હુમલાને કારણે ટેન્કર ખોટકાઈ ગયું અને તેના એન્જિન રૂમમાં આગ લાગી ગઈ.
કેન્દ્રીય બંદર, જહાજ અને જળમાર્ગ મંત્રી સર્બાનંદ સોનોવાલે મંગળવારે X પર પોસ્ટ કરીને કહ્યું હતું કે, “16 નવેમ્બરે તારા ગેસ પર મિસાઈલ હુમલો થયો. તમામ 24 ભારતીય નાગરિકો સહિત સમગ્ર 25 સભ્યોનો ક્રૂ સંપૂર્ણ સુરક્ષિત છે, કોઈને ઈજા નથી. અમે પરિસ્થિતિ પર સતત નજર રાખી રહ્યા છીએ અને શિપ મેનેજમેન્ટ કંપની સાથે સંપર્કમાં છીએ.”
પહેલા હુમલા બાદ બધા સુરક્ષિત હોવાનું કહેવાયું હતું, પણ મંગળવારે બીજો હુમલો થયો. બીજા હુમલામાં પણ જહાજ પર આગ લાગી. આ પછી ક્રૂને જહાજ છોડવાની ફરજ પડી.
તાજા અહેવાલો મુજબ, બીજા હુમલા બાદ 24 ક્રૂ મેમ્બરનો હિસાબ મળ્યો છે, પણ *1 ભારતીય નાવિક લાપતા* છે. શિપ મેનેજમેન્ટ કંપની અને પ્રાદેશિક રેસ્ક્યૂ ટીમો સાથે મળીને તેને શોધવા માટે સંકલન કરવામાં આવી રહ્યું છે. ભારત સરકાર પરિસ્થિતિ પર સતત નજર રાખી રહી છે.
તારા ગેસ પરનો હુમલો એક અઠવાડિયામાં ભારતીય નાવિકોને લઈ જતા ટેન્કર પરનો બીજો હુમલો છે. આ પહેલા સાઉદી અરેબિયા ધ્વજવાળા ઓઈલ ટેન્કર પર હુમલો થયો હતો, જેમાં 3 ભારતીય નાવિકો હતા. તમામ ક્રૂને UAE કોસ્ટ ગાર્ડે બચાવ્યા હતા.
છેલ્લા 24 કલાકમાં ઓછામાં ઓછા 4 ઓઈલ ટેન્કરને નુકસાન થયાના અહેવાલ છે. ઈરાનિયન નેવીએ કહ્યું છે કે ચોથા ટેન્કરમાં પૂર્વ સ્ટ્રેટ ઓફ હોર્મુઝમાં નેવલ માઈન સાથે અથડાયા બાદ આગ લાગી. શનિવારે પણ 3 ઓઈલ ટેન્કરમાં નેવલ માઈન સાથે અથડાયા બાદ વિસ્ફોટ અને આગ લાગી હતી.
સ્ટ્રેટ ઓફ હોર્મુઝમાંથી વિશ્વના લગભગ 20% પેટ્રોલિયમ શિપમેન્ટ પસાર થાય છે. તેથી આ હુમલાઓએ ભારતની ઉર્જા સુરક્ષા અને વૈશ્વિક વેપાર માટે ચિંતા વધારી દીધી છે. વિદેશ મંત્રાલયના પ્રવક્તા રણધીર જયસ્વાલે ગયા અઠવાડિયે કહ્યું હતું કે નવી દિલ્હી નાગરિક શિપિંગ પર હુમલા રોકવા અને નાવિકોની સુરક્ષા સુનિશ્ચિત કરવા માટે તમામ સંબંધિત પક્ષો સાથે સંપર્કમાં છે.
(4:52 PM IST)









છેલ્લા 8 દિવસમાં સૌથી લોકપ્રિય 
