નવી દિલ્હી: હિમાલયની પવિત્ર ખીણોમાં બિરાજમાન બાબા બર્ફાનીના દર્શનની આતુરતાથી રાહ જોતા શિવભક્તો માટે યાત્રાનો શંખનાદ થઈ ગયો છે. વર્ષ 2026ની અમરનાથ યાત્રા માટે આગામી 15 એપ્રિલથી એડવાન્સ રજીસ્ટ્રેશન પ્રક્રિયા શરૂ થવાની સત્તાવાર જાહેરાત કરવામાં આવી છે. શ્રી અમરનાથજી શ્રાઈન બોર્ડના જણાવ્યા અનુસાર, આ વખતે પણ 'વહેલા તે પહેલા'ના ધોરણે નોંધણી કરવામાં આવશે, તેથી ભક્તોએ અત્યારથી જ પોતાની તૈયારીઓ તેજ કરી દેવી પડશે. દક્ષિણ કાશ્મીરમાં 3,880 મીટરની ઊંચાઈએ આવેલી પવિત્ર ગુફા સુધી પહોંચવા માટે પહેલગામ અને બાલતાલ એમ બે પરંપરાગત માર્ગોનો ઉપયોગ કરવામાં આવશે, જ્યાં કુદરતી રીતે બનતા બરફના શિવલિંગના દર્શન માટે લાખો શ્રદ્ધાળુઓ ઉમટી પડશે.

આગામી યાત્રા માટે શ્રાઈન બોર્ડે સુરક્ષા અને સ્વાસ્થ્યને પ્રાથમિકતા આપતા કડક માર્ગદર્શિકા જારી કરી છે. યાત્રામાં જોડાવા ઈચ્છતા 13 થી 70 વર્ષની વયના દરેક ભક્ત માટે બાયોમેટ્રિક પ્રમાણીકરણ અને RFID કાર્ડ ફરજિયાત બનાવવામાં આવ્યું છે. દેશભરની 554 નિયુક્ત બેંક શાખાઓ અથવા ઓનલાઈન પોર્ટલ દ્વારા નોંધણી કરાવી શકાશે. ખાસ કરીને, પર્વતીય વિસ્તારોમાં ઓક્સિજનની કમી અને કઠિન ચઢાણને ધ્યાનમાં રાખીને તબીબી ફિટનેસ સર્ટિફિકેટ અનિવાર્ય રહેશે. સલામતીના કારણોસર છ અઠવાડિયાથી વધુ સમયની ગર્ભવતી મહિલાઓ અને ગંભીર બીમારી ધરાવતા લોકોને યાત્રામાં સામેલ ન થવા સૂચના આપવામાં આવી છે.

મુસાફરી દરમિયાન પ્રતિકૂળ હવામાન અને ભૌગોલિક પડકારોનો સામનો કરવા માટે ભક્તોને ખાસ સાવચેતી રાખવા જણાવાયું છે. પર્વતોમાં તાપમાન અચાનક 5 ડિગ્રી સેલ્સિયસથી નીચે જઈ શકે તેમ હોવાથી ગરમ કપડાં, ટ્રેકિંગ શૂઝ અને રેઈનકોટ જેવી આવશ્યક ચીજો સાથે રાખવી અનિવાર્ય છે. શ્રાઈન બોર્ડે સ્પષ્ટ કર્યું છે કે RFID કાર્ડ વિના કોઈ પણ યાત્રાળુને બેઝ કેમ્પથી આગળ જવાની મંજૂરી આપવામાં આવશે નહીં. આ ઉપરાંત, પર્યાવરણની જાળવણી માટે પ્લાસ્ટિક અને પોલીથીન પર સંપૂર્ણ પ્રતિબંધ લાદવામાં આવ્યો છે. ભક્તોને શોર્ટકટ ન અપનાવવા અને કોઈપણ સ્વાસ્થ્ય સંબંધી તકલીફ જણાય તો તાત્કાલિક મેડિકલ કેમ્પનો સંપર્ક કરવા તાકીદ કરવામાં આવી છે.