દુબઈ: સંયુક્ત આરબ અમીરાત (UAE) માં રહેતા ગુજરાતીઓ અને અન્ય વાહનચાલકો માટે ચિંતાજનક સમાચાર આવ્યા છે. મે 2026 ના મહિના માટે ફ્યુઅલ પ્રાઈસ મોનિટરિંગ કમિટીએ પેટ્રોલ અને ડીઝલના નવા ભાવ જાહેર કર્યા છે, જેમાં નોંધપાત્ર વધારો કરવામાં આવ્યો છે. આ નવા દરો આવતીકાલ એટલે કે 1 મે થી અમલી બનશે. મધ્ય પૂર્વમાં વધી રહેલા તણાવ અને વૈશ્વિક બજારમાં ક્રૂડ ઓઈલની કિંમતોમાં થયેલા વધારાને કારણે આ નિર્ણય લેવામાં આવ્યો છે.

ભાવમાં કેટલો વધારો થયો?

એપ્રિલ મહિનાની સરખામણીએ મે મહિનામાં પેટ્રોલના તમામ પ્રકારોમાં ભાવ વધ્યા છે. ખાસ કરીને સુપર 98 અને સ્પેશિયલ 95 માં પ્રતિ લિટર આશરે 27 ફિલનો વધારો જોવા મળ્યો છે.

• સુપર 98: એપ્રિલમાં Dh3.39 હતું, જે હવે વધીને Dh3.66 પ્રતિ લિટર થયું છે.
• સ્પેશિયલ 95: એપ્રિલમાં Dh3.28 હતું, જે હવે વધીને Dh3.55 પ્રતિ લિટર થયું છે.
• ઈ-પ્લસ 91: એપ્રિલમાં Dh3.28 હતું, જે હવે વધીને Dh3.48 પ્રતિ લિટર થયું છે.

વૈશ્વિક તણાવની અસર

UAE ની ફ્યુઅલ કમિટી દર મહિને આંતરરાષ્ટ્રીય બજારમાં તેલના ભાવ અને વિતરણ ખર્ચના આધારે ભાવ નક્કી કરે છે. હાલમાં ઈરાન અને ઈઝરાયેલ-અમેરિકા વચ્ચે ચાલી રહેલા સંઘર્ષને કારણે આંતરરાષ્ટ્રીય બજારમાં ક્રૂડ ઓઈલના ભાવમાં અસ્થિરતા જોવા મળી રહી છે. સતત બીજા મહિને થયેલા આ ભાવવધારાથી ટ્રાન્સપોર્ટેશન ખર્ચમાં પણ વધારો થવાની શક્યતા છે, જેની અસર જીવનજરૂરી ચીજવસ્તુઓના ભાવ પર પડી શકે છે.

વાહનચાલકોના ખિસ્સા પર બોજ

એપ્રિલમાં પણ ભાવવધારો થયા બાદ મે મહિનામાં ફરી થયેલો આ વધારો મધ્યમ વર્ગના મુસાફરો અને ટેક્સી ચાલકો માટે માથાના દુખાવા સમાન છે. નિષ્ણાતોનું માનવું છે કે જ્યાં સુધી વૈશ્વિક સ્તરે તેલના સપ્લાય અને ભૌગોલિક રાજકીય સ્થિતિ (Geopolitical Situation) માં સુધારો નહીં થાય, ત્યાં સુધી આગામી મહિનાઓમાં પણ ભાવમાં આવી જ વધઘટ જોવા મળી શકે છે.