મુંબઈ :ટેલિવિઝન અને ફિલ્મ જગતની જાણીતી અભિનેત્રી મદાલસા શર્માએ ગ્લેમર ઉદ્યોગની પાછળ છુપાયેલા અંધકારમય સત્યને ઉજાગર કરતા કાસ્ટિંગ કાઉચનો ચોંકાવનારો અનુભવ શેર કર્યો છે. એક ઈન્ટરવ્યુ દરમિયાન મદાલસાએ ખુલાસો કર્યો કે જ્યારે તે માત્ર 19 વર્ષની હતી અને પોતાની કારકિર્દી બનાવવા સંઘર્ષ કરી રહી હતી, ત્યારે એક ખ્યાતનામ ફિલ્મ નિર્માતાએ તેને મીટિંગ માટે બોલાવી હતી. શરૂઆતમાં સામાન્ય લાગતી આ મુલાકાતે ત્યારે વરવું સ્વરૂપ ધારણ કર્યું જ્યારે નિર્માતાએ તેની પાસે અણછાજતી માંગણી કરી. આ ઘટસ્ફોટ બાદ સોશિયલ મીડિયા પર ચાહકોમાં ભારે રોષ જોવા મળી રહ્યો છે અને ફિલ્મ જગતના કાળા પાસાઓ પર ફરી એકવાર ચર્ચાઓ તેજ બની છે.

મદાલસાએ આ કડવો અનુભવ વર્ણવતા જણાવ્યું કે, તે નિર્માતાએ તેની સમક્ષ બિકીની પહેરવાની શરત મૂકી હતી. અભિનેત્રીએ જ્યારે તેને વ્યાવસાયિક રીતે પૂછ્યું કે પાત્ર માટે આ જરૂરી છે કે કેમ, ત્યારે નિર્માતાએ બધી મર્યાદાઓ નેવે મૂકીને કહ્યું હતું કે, "મારે જોવું છે કે તું તેમાં કેવી લાગે છે, અત્યારે જ મારી સામે બિકીની પહેરીને બતાવ." આ વાત સાંભળીને મદાલસા હેબતાઈ ગઈ હતી. તે સમયે ઇન્ડસ્ટ્રીમાં નવી હોવા છતાં તેણે હિંમત બતાવી હતી અને સમજાયું હતું કે આ તક કોઈ કલાના હેતુથી નહીં પરંતુ ખોટા ઈરાદાથી આપવામાં આવી રહી હતી. આ ઘટનાએ તેને ઉદ્યોગના ગંદા ખેલથી સાવધ કરી દીધી હતી.

આ ઘટના માત્ર એક કલાકારના સંઘર્ષની વાર્તા નથી, પરંતુ તે ઉદ્યોગમાં રહેલી માનસિકતા પર પણ આકરા પ્રહાર કરે છે. મદાલસાના મતે, ગ્લેમરની દુનિયામાં આવતી યુવતીઓએ દરેક તક પાછળના સાચા ઈરાદાને પારખવા ખૂબ જ જરૂરી છે. જોકે આ અનુભવથી તે ડરી જવાને બદલે વધુ મજબૂત બની અને આજે તે પોતાની મહેનતથી એક સફળ મુકામ પર પહોંચી છે. કાસ્ટિંગ કાઉચ જેવી પ્રથાઓ સામે અવાજ ઉઠાવીને તેણે અન્ય ઉભરતા કલાકારોને પણ સતર્ક રહેવા અને ગરિમા જાળવી રાખવાનો સંદેશ આપ્યો છે. હાલમાં આ મુદ્દો ફિલ્મ વર્તુળોમાં ભારે ચર્ચાનો વિષય બન્યો છે.