મેસરા (ઝારખંડ), તા.૧૩: ભારતના ટેકનિકલ શિક્ષણ ક્ષેત્રે એક મોટું સોપાન સર કરતા ઝારખંડ સ્થિત પ્રખ્યાત બિરલા ઇન્સ્ટિટ્યૂટ ઑફ ટેક્નોલોજી (BIT), મેસરાએ વૈશ્વિક શૈક્ષણિક ક્ષિતિજો વિસ્તારવા માટે યુનાઇટેડ સ્ટેટ્સની એરિઝોના સ્ટેટ યુનિવર્સિટી સાથે સમજૂતી કરાર (MoU) કર્યા છે. આ ભાગીદારીનો મુખ્ય ઉદ્દેશ્ય ભારતીય વિદ્યાર્થીઓને આંતરરાષ્ટ્રીય કક્ષાનું એક્સપોઝર પૂરું પાડવાનો અને વૈશ્વિક નવીનતા સાથે સ્થાનિક ટેકનિકલ શિક્ષણને સાંકળવાનો છે.

શિક્ષણથી રોજગારી સુધીનો માર્ગ થશે સરળ

BIT-મેસરાના વાઇસ ચાન્સેલર ઇન્દ્રનીલ મન્નાએ આ જોડાણને આવકારતા જણાવ્યું હતું કે, "અમારી સંસ્થાની ટેકનિકલ ચોકસાઈ અને એરિઝોના સ્ટેટ યુનિવર્સિટીના વૈશ્વિક સંશોધનોના સમન્વયથી અમે એક એવી ઇકોસિસ્ટમ તૈયાર કરી રહ્યા છીએ, જે વર્ષોથી ચાલી આવતી 'શિક્ષણથી રોજગારી' વચ્ચેની ખાઈને પૂરશે." આ જોડાણથી વિદ્યાર્થીઓને માત્ર ડિગ્રી જ નહીં, પરંતુ વૈશ્વિક બજારની જરૂરિયાત મુજબની રોજગારી માટે સજ્જ કરવામાં આવશે.

રાષ્ટ્રીય શિક્ષણ નીતિ-2020 ને વેગ મળશે

ભારત સરકારની રાષ્ટ્રીય શિક્ષણ નીતિ-2020 (NEP) મુજબ ઉચ્ચ શિક્ષણના આંતરરાષ્ટ્રીયકરણ પર વિશેષ ભાર મૂકવામાં આવ્યો છે. BIT-મેસરાની આ પહેલ તે દિશામાં એક વ્યૂહાત્મક પગલું માનવામાં આવે છે. આ MoU હેઠળ બંને સંસ્થાઓ ફેકલ્ટી એક્સચેન્જ પ્રોગ્રામ, વિદ્યાર્થી વિકાસ કાર્યક્રમો અને સંયુક્ત સંશોધન પ્રોજેક્ટ્સ પર સાથે મળીને કામ કરશે. આનાથી ભારતીય વિદ્યાર્થીઓને આંતરરાષ્ટ્રીયકૃત અભ્યાસક્રમનો લાભ મળશે જે ભારતને ગ્લોબલ નોલેજ હબ બનાવવાના સ્વપ્નને સાકાર કરવામાં મદદરૂપ થશે.

સંશોધન અને સંવાદનો નવો પાયો

બુધવારે જારી કરાયેલા સત્તાવાર નિવેદન અનુસાર, આ સમજૂતી કરાર બંને પ્રતિષ્ઠિત સંસ્થાઓ વચ્ચે સતત જ્ઞાનની આપ-લે માટે એક ઔપચારિક મંચ પૂરો પાડે છે. આગામી સમયમાં, આ પાયા પરથી અનેક મોટા શૈક્ષણિક અને સંશોધન પ્રોજેક્ટ્સ આકાર લેશે, જેની સીધી અસર ટેકનિકલ શિક્ષણના સ્તર અને વૈશ્વિક જોડાણો પર જોવા મળશે. ભારતીય શિક્ષણ જગતમાં આ આંતરરાષ્ટ્રીય ભાગીદારી એક નવી ક્રાંતિ લાવશે તેવી આશા વ્યક્ત કરવામાં આવી રહી છે.