નવી દિલ્હી -વૈશ્વિક સ્તરે સાયબર સુરક્ષા એજન્સીઓ દ્વારા ગંભીર ચેતવણી જારી કરવામાં આવી છે કે જો સંવેદનશીલ વેબસાઇટ્સ તાત્કાલિક ધોરણે ક્રિટિકલ PHP ખામીઓને પેચ (સુરક્ષા અપડેટ) ન કરી શકે, તો તેમણે પોતાની વેબસાઇટ્સ અસ્થાયી રૂપે ઓફલાઇન (ડાર્ક) કરી દેવી જોઈએ. PHP સુરક્ષા ટીમ દ્વારા બે ગંભીર રિમોટ-કોડ-એક્ઝિક્યુશન (RCE) Vulnerabilities ને દૂર કરવા માટે આ ઇમરજન્સી સુરક્ષા અપડેટ બહાર પાડવામાં આવી રહી છે.

ખામીઓની વિગતો અને સંભવિત જોખમો:
આ સુરક્ષા ખામીઓની ઓળખ CVE-2026-109618 અને CVE-2026-109619 તરીકે કરવામાં આવી છે, જેને CVSS v4.0 સ્કેલ પર ૧૦માંથી ૯.૨ નો અત્યંત ગંભીર સ્કોર આપવામાં આવ્યો છે. આ ખામીઓના કારણે કોઈપણ ઓથેન્ટિકેશન વગરના (અનઓથેન્ટિકેટેડ) હુમલાખોરો ઇન્ટરનેટ દ્વારા પ્રભાવિત સર્વર્સ પર દુર્ભાવનાપૂર્ણ કોડ ચલાવી શકે છે અને સર્વરનો તાબો મેળવી શકે છે.

આ જોખમને ધ્યાનમાં રાખીને EU સંસ્થાઓની સાયબર સુરક્ષા સેવા CERT-EU એ કડક નિર્દેશ કર્યો છે કે સંસ્થાઓએ રિલીઝ થતાં જ ઇમરજન્સી પેચ લાગુ કરી દેવા. જેઓ સક્ષમ ન હોય તેઓએ સાયબર ધૂસખોરી અટકાવવા વેબસાઇટ્સ સંપૂર્ણપણે બંધ કરી દેવી જોઈએ. ઓસ્ટ્રેલિયન સાયબર સિક્યોરિટી સેન્ટર (ACSC) એ પણ એડમિનિસ્ટ્રેટર્સને સિસ્ટમમાં શંકાસ્પદ પ્રવૃત્તિઓ પર સક્રિય નજર રાખવા સૂચના આપી છે.

વ્યાપક અસર અને ટેકનિકલ પડકારો:
PHP આજના આધુનિક ઇન્ટરનેટનો અદ્રશ્ય પાયો છે, જે કન્ટેન્ટ મેનેજમેન્ટ સિસ્ટમ્સ (CMS), ઇ-કોમર્સ વેબસાઇટ્સ અને વેબ પ્લેટફોર્મ્સનું સંચાલન કરે છે. જો આ ખામીઓનો દુરુપયોગ થાય તો કોર્પોરેટ ડેટાબેઝ લીક થવા, યુઝરની માહિતી ચોરાવાની, વેબસાઇટ ડિફેસ થવાની તેમજ રેન્સમવેર ડિપ્લોય થવાનું જોખમ રહેલું છે. ક્લાઉડ ઇન્ફ્રાસ્ટ્રક્ચર જાયન્ટ ક્લાઉડફ્લેરના CTO ડેન નાઈચટે જણાવ્યું છે કે હુમલાઓ શરૂ થઈ રહ્યા છે અને WAF પ્રોવાઈડર્સ તેના રક્ષણ માટે સક્રિય છે.

વેબસાઇટ માલિકો માટે આ પડકારજનક છે કારણ કે માત્ર વર્ડપ્રેસ પ્લગઇન કે CMS અપડેટ કરવાથી આ PHP રનટાઇમની ખામી દૂર થતી નથી, પરંતુ PHP રનટાઇમ પર જ સુરક્ષા અપડેટ લાગુ કરવી પડે છે. આ ઉપરાંત, ભારતીય સુરક્ષા ફર્મ eMudhra ના emSign બ્રાન્ડ હેઠળ જારી કરાયેલા આઠ ઇન્ટરમીડિયેટ સર્ટિફિકેટ ઓથોરિટી (CA) સર્ટિફિકેટ્સને લગતી સુરક્ષા ચિંતાઓએ પણ ઓનલાઇન સુરક્ષાના પ્રશ્નોને વધુ ઉજાગર કર્યા છે.