વોશિંગ્ટન :  વિશ્વની મહાસત્તાઓના નાણામંત્રીઓ અને કેન્દ્રીય બેંકના ગવર્નરોની તાજેતરની બેઠકમાં વિકાસના આંકડાઓને બદલે 'અદ્રશ્ય તોફાન' વિશે વધુ ચર્ચા થઈ હતી. નિષ્ણાતોનું માનવું છે કે ઈરાન અને ઈઝરાયેલ વચ્ચે વધતું તણાવ વૈશ્વિક પુરવઠા શૃંખલાને તોડી શકે છે. ખાસ કરીને તેલ અને ગેસના ભાવમાં ઉછાળો આવતા જ પરિવહન ખર્ચ વધી જશે, જેની સીધી અસર દૂધ, શાકભાજી અને દવાની કિંમતો પર પડશે. યુરોપિયન સ્ટેબિલિટી મિકેનિઝમના જણાવ્યા મુજબ, પેટ્રોલ પંપો પરના વધતા ભાવ એ તો માત્ર શરૂઆત છે, અસલી આર્થિક આંચકો હજુ આવવાનો બાકી છે.

સૌથી મોટો ડર 'સ્ટેગફ્લેશન'  નો છે, જ્યાં મોંઘવારી વધે છે પરંતુ અર્થતંત્રમાં કોઈ વૃદ્ધિ થતી નથી. જો હોર્મુઝની સામુદ્રધુની જેવો મહત્વનો દરિયાઈ માર્ગ આંશિક રીતે પણ બંધ થાય, તો વૈશ્વિક ફુગાવો 2.5% સુધી વધી શકે છે. આ સ્થિતિમાં કંપનીઓ નવી ભરતી બંધ કરી દે છે અને પગાર વધારાની શક્યતાઓ નહિવત થઈ જાય છે. ભારત અને ચીન જેવા દેશો, જે આયાતી તેલ પર નિર્ભર છે, તેમના માટે આ સ્થિતિ વધુ ઘાતક સાબિત થઈ શકે છે કારણ કે નૂર  મોંઘું થતા દરેક ઓનલાઈન ડિલિવરી અને લોજિસ્ટિક્સનો ખર્ચ વધી જશે.

કેન્દ્રીય બેંકો પણ આ અનિશ્ચિતતામાં મૂંઝવણમાં છે. જો મોંઘવારી વધે તો વ્યાજ દરો વધારવા પડશે, જેનાથી તમારી હોમ લોન અને કાર લોનના EMI મોંઘા થશે. શેરબજારમાં હાલ જે શાંતિ દેખાય છે તે વાસ્તવમાં 'તોફાન પહેલાની શાંતિ' હોઈ શકે છે. વિદેશી નિષ્ણાતોના મતે, યુદ્ધ ભલે હજારો કિલોમીટર દૂર હોય, પરંતુ તેની અસરો ઊંચા EMI, મોંઘું રાંધણ ગેસ અને શેરબજારના ઘટાડા તરીકે તમારા ઘરના દરવાજા સુધી દસ્તક દઈ રહી છે. વિશ્વના નીતિ નિર્માતાઓ હવે સાવચેતીભર્યા પગલાં લેવાની તૈયારી કરી રહ્યા છે.