નવી દિલ્હી :  વિદેશી પ્રવાસના શોખીન ભારતીય સૈલાણીઓ માટે ટેકનોલોજીના ક્ષેત્રે એક અત્યંત રોમાંચક સમાચાર સામે આવ્યા છે. હવે યુનાઈટેડ આરબ અમીરાત (UAE) અને સિંગાપોરની મુલાકાતે જતા પ્રવાસીઓએ કરન્સી એક્સચેન્જ કે આંતરરાષ્ટ્રીય ક્રેડિટ કાર્ડના વધારાના ચાર્જિસની ચિંતા કરવાની જરૂર નથી. ભારતીયો હવે પોતાની મનપસંદ UPI એપ્લિકેશન દ્વારા આ બંને દેશોના સૌથી લોકપ્રિય પ્રવાસન સ્થળો માટે સીધું જ ઓનલાઈન બુકિંગ કરી શકશે અને સેકન્ડોમાં ચૂકવણી પૂર્ણ કરી શકશે, જેનાથી આંતરરાષ્ટ્રીય પ્રવાસનું આયોજન અગાઉ કરતા વધુ સીમલેસ બની ગયું છે.

નેશનલ પેમેન્ટ્સ કોર્પોરેશન ઓફ ઈન્ડિયા (NPCI) ની વિદેશી શાખા NIPL દ્વારા લેવાયેલા આ ક્રાંતિકારી નિર્ણય હેઠળ મહત્વપૂર્ણ વ્યૂહાત્મક ભાગીદારી કરવામાં આવી છે. UAE માં NEOPay અને Emaar Entertainment ના સહયોગથી વિશ્વની સૌથી ઊંચી ઈમારત 'બુર્જ ખલીફા' ના 'At the Top' વ્યુઈંગ ડેક માટે UPI ચુકવણી શરૂ થઈ ચૂકી છે. તો બીજી તરફ, સિંગાપોરમાં FOMO Pay ના સહયોગથી રિસોર્ટ્સ વર્લ્ડ સેન્ટોસા, યુનિવર્સલ સ્ટુડિયો, સિંગાપોર ઓશનેરિયમ અને એડવેન્ચર કોવ વોટરપાર્ક જેવા વૈશ્વિક આકર્ષણો પર ભારતીય UPI સ્વીકાર્ય બની ગયું છે.

ભારતની આ ડિજિટલ પેમેન્ટ ક્રાંતિ માત્ર UAE અને સિંગાપોર પૂરતી મર્યાદિત નથી, પરંતુ વિશ્વભરમાં ઝડપથી વિસ્તરી રહી છે. હાલમાં ફ્રાન્સ, મોરેશિયસ, નેપાળ, ભૂતાન, કતાર, શ્રીલંકા, કંબોડિયા અને ગ્રીસ સહિત કુલ ૧૦ દેશોમાં UPI પેમેન્ટ સુવિધા કાર્યરત થઈ ગઈ છે, જ્યારે ઉઝબેકિસ્તાન પણ ટૂંક સમયમાં આ યાદીમાં ૧૧મા દેશ તરીકે જોડાવા જઈ રહ્યું છે. ભારતીય રૂપિયા અને ડિજિટલ ટેકનોલોજીના આ ગ્લોબલ પાવરથી હવે ભારતીય પ્રવાસીઓ માટે વિશ્વભરમાં મુસાફરી કરવી વધુ સરળ, સુરક્ષિત અને આનંદદાયક બની રહેશે.