નવી દિલ્હી:  કઝાકિસ્તાનની રાજધાની અસ્તાનામાં આયોજિત શાંઘાઈ કોઓપરેશન ઓર્ગેનાઇઝેશન  ના વિદેશ મંત્રીઓની પરિષદમાં ભારતના વિદેશ મંત્રી એસ. જયશંકરે વૈશ્વિક મંચ પરથી દુનિયાના શક્તિશાળી દેશોને એક અત્યંત સ્પષ્ટ અને કડક સંદેશ આપ્યો છે. તેમણે આંતરરાષ્ટ્રીય બજારો, મહત્વપૂર્ણ સંસાધનો અને વૈશ્વિક નાણાકીય પ્રણાલીઓના 'શસ્ત્રીકરણ' (હથિયાર તરીકે ઉપયોગ) સામે સખત વિરોધ નોંધાવ્યો હતો. જયશંકરે ભારપૂર્વક જણાવ્યું કે વર્તમાન સમયમાં જે રીતે આર્થિક પ્રતિબંધો અને સપ્લાય ચેઈનની કટોકટી ઊભી કરીને રાજકીય દબાણ લાવવાના પ્રયાસો થઈ રહ્યા છે, તેનાથી સમગ્ર વૈશ્વિક અર્થતંત્ર નબળું પડી રહ્યું છે અને તેનો સૌથી મોટો ભોગ વિકાસશીલ દેશો (ગ્લોબલ સાઉથ) બની રહ્યા છે.

વિદેશ મંત્રીએ પોતાના સંબોધનમાં ચીનની 'બેલ્ટ એન્ડ રોડ ઇનિશિયેટિવ' (BRI) અને પાકિસ્તાન અધિકૃત કાશ્મીર (PoK) માંથી પસાર થતા આર્થિક કોરિડોર પર પરોક્ષ પ્રહારો કર્યા હતા. તેમણે કહ્યું કે દેશો વચ્ચેના આર્થિક અને કનેક્ટિવિટી પ્રોજેક્ટ્સ સંપૂર્ણપણે પારદર્શક હોવા જોઈએ અને તેમાં સભ્ય દેશોની પ્રાદેશિક અખંડિતતા તેમજ સાર્વભૌમત્વનો આદર થવો અનિવાર્ય છે. આ સાથે જ તેમણે આતંકવાદના મુદ્દે પાકિસ્તાન અને તેને છાવરતા ચીન જેવા દેશોના બેવડા ધોરણોની આકરી ટીકા કરી હતી. તેમણે સ્પષ્ટ શબ્દોમાં સંભળાવી દીધું કે સરહદ પારથી ચાલતા આતંકવાદ, આતંકવાદી ફંડિંગ અને સુરક્ષિત આશ્રયસ્થાનોને જડમૂળથી ઉખાડી ફેંકવા માટે હવે વૈશ્વિક સ્તરે 'ઝીરો ટોલરન્સ' (શૂન્ય સહિષ્ણુતા) ની નીતિ અપનાવવાનો સમય આવી ગયો છે.

વૈશ્વિક પ્રણાલીમાં મોટા સુધારાની વકીલાત કરતા જયશંકરે સંયુક્ત રાષ્ટ્ર સુરક્ષા પરિષદ (UNSC) ના માળખામાં તાત્કાલિક ફેરફાર કરવાની માંગ દોહરાવી હતી. તેમણે કહ્યું કે વર્તમાન વૈશ્વિક સંસ્થાઓ આજના સમયની વાસ્તવિકતા દર્શાવતી નથી, તેથી દુનિયાના ગરીબ દેશો માટે ઇંધણ, અન્ન અને ખાતરની સુરક્ષા સુનિશ્ચિત કરવા ગ્લોબલ સાઉથનો અવાજ મજબૂત કરવો જરૂરી છે. આ ઉપરાંત, તેમણે આબોહવા પરિવર્તનના મુદ્દે વિકસિત દેશોને તેમની નાણાકીય અને ટેકનોલોજી સહાયની જવાબદારીઓ યાદ અપાવી હતી, અને ડિજિટલ ટેકનોલોજી તથા સ્ટાર્ટઅપ ઇકોસિસ્ટમ ક્ષેત્રે ભારતની ક્ષમતાઓનો લાભ SCO દેશોને આપવાની પ્રતિબદ્ધતા વ્યક્ત કરી હતી.