બીજિંગમાં રશિયાના રાષ્ટ્રપતિ વ્લાદિમીર પુતિન અને ચીનના રાષ્ટ્રપતિ શી જિનપિંગની મુલાકાત બાદ વૈશ્વિક રાજકારણમાં ગરમાવો જોવા મળી રહ્યો છે. આ બેઠકમાં બંને નેતાઓએ અમેરિકાની નીતિઓ પર આકરા પ્રહાર કરતા એક સંયુક્ત નિવેદન બહાર પાડ્યું છે, જેમાં ખાસ કરીને આંતરિક બાબતોમાં હસ્તક્ષેપ, ‘જંગલરાજ’ જેવી વર્તણૂક અને ઉત્તર કોરિયા પરના પ્રતિબંધોને લઈને ગંભીર વાંધાઓ ઉઠાવવામાં આવ્યા છે.

શી-જિનપિંગે સ્પષ્ટ શબ્દોમાં અમેરિકન નીતિઓને ‘જંગલરાજ’ ગણાવી ટીકા કરી હતી અને જણાવ્યું હતું કે અન્ય દેશોના આંતરિક મામલાઓમાં દખલગીરી અને જૂથવાદ ભડકાવવાનું બંધ થવું જોઈએ. વ્લાદિમીર પુતિને તેમના સંબોધનમાં બ્રિક્સ (BRICS)ની સફળતાને બિરદાવતા હવે યુરેશિયન દેશોના વધુ મજબૂત અને વ્યાપક ગઠબંધન પર ભાર મૂક્યો છે. આ બેઠક માત્ર રશિયા અને ચીન વચ્ચેની નિકટતા દર્શાવતી નથી, પરંતુ વૈશ્વિક સ્તરે અમેરિકાના પ્રભાવને પડકારીને એક નવા શક્તિ સંતુલન ઊભું કરવાનો સ્પષ્ટ પ્રયાસ પણ જણાય છે.

તેલ અને ગેસની વૈશ્વિક કટોકટી વચ્ચે રશિયાએ ચીનને પુરવઠો વધારવાની ખાતરી આપી છે, જે પશ્ચિમી દેશોના પ્રતિબંધોનો સામનો કરવાની તેમની રણનીતિનો ભાગ છે. બંને નેતાઓએ ઉત્તર કોરિયા પર લાદવામાં આવેલા પ્રતિબંધોને પણ વિકાસના માર્ગમાં અવરોધ ગણાવ્યા છે. વધુમાં, અમેરિકા અને તેના સહયોગીઓ દ્વારા ઉચ્ચ અક્ષાંશ વિસ્તારોના સૈનિકીકરણ પર પણ ચીન-રશિયાએ ઊંડી ચિંતા વ્યક્ત કરી છે. દક્ષિણ-પશ્ચિમ એશિયામાં આ બદલાતા સમીકરણો સૂચવે છે કે એક તરફ અમેરિકા તેના સહયોગીઓ સાથે જોડાણ વધારી રહ્યું છે, તો બીજી તરફ ચીન અને રશિયાના ગાઢ સંબંધો વૈશ્વિક મુત્સદ્દીગીરીમાં નવો વળાંક લાવી રહ્યા છે. આ ઘટનાક્રમ વિશ્વની બદલાતી સુરક્ષા વ્યવસ્થા અને ભવિષ્યના રાજદ્વારી ગઠબંધનો તરફ સ્પષ્ટ ઈશારો કરે છે, જેનાથી ભવિષ્યમાં સત્તાના સમીકરણો વધુ જટિલ બની શકે છે.