બીજિંગ : ચીનના રાષ્ટ્રપતિ શી જિનપિંગે ૧૮મા બ્રિક્સ સમિટ દરમિયાન વૈશ્વિક મંચ પરથી આંતરરાષ્ટ્રીય નિયમોની અનિવાર્યતા પર ભાર મૂકતા જણાવ્યું હતું કે નિયમો વિનાની દુનિયા ટ્રાફિક સિગ્નલ વિનાના ક્રોસરોડ્સ જેવી છે અને કોઈ એક શક્તિશાળી દેશની મનમાની હવે સ્વીકાર્ય નથી. તેમણે ગ્લોબલ સાઉથના દેશોને એક થઈને આંતરરાષ્ટ્રીય કાયદાનું રક્ષણ કરવા, બેવડા ધોરણો સામે અવાજ ઉઠાવવા અને અન્ય દેશોની આંતરિક બાબતોમાં દખલગીરી ન કરવાના સિદ્ધાંતોનું પાલન કરવા આહ્વાન કર્યું હતું. સમિટમાં હાજર વૈશ્વિક નેતાઓ સમક્ષ ચીને સમાનતા, પરસ્પર ફાયદાકારક ખુલ્લા સહયોગ અને વૈશ્વિક વિકાસ લક્ષ્યોને પ્રાથમિકતા આપવાનો સ્પષ્ટ સંદેશ આપ્યો છે.

આર્થિક સહયોગ અને સપ્લાય ચેઇનને મજબૂત બનાવવાના હેતુસર શી જિનપિંગે પાંચ નવી અને આક્રમક પહેલોનો પ્રસ્તાવ મૂક્યો છે, જેમાં પ્રથમ પહેલ તરીકે આર્ટિફિશિયલ ઇન્ટેલિજન્સ (AI) માટે ખુલ્લું માળખું અને મોટા ભાષા મોડેલો પર સંયુક્ત સહયોગ સ્થાપવાની વાત છે. બીજી પહેલ હેઠળ વેપાર અને રોકાણને સરળ બનાવવા માટે 'બ્રિક્સ સ્પેશિયલ ઇકોનોમિક ઝોન પાર્ટનરશિપ' બનાવવાનો પ્રસ્તાવ છે, જ્યારે ત્રીજી પહેલ અંતર્ગત ડિજિટલ ઉદ્યોગો માટે સામાન્ય ક્લાઉડ પ્લેટફોર્મ ઊભું કરવામાં આવશે. ચોથી પહેલ આધુનિક ફેક્ટરીઓ અને બુદ્ધિશાળી મશીનોના નિર્માણ સાથે જોડાયેલી છે અને પાંચમી પહેલ વિજ્ઞાન તેમજ ટેકનોલોજી ક્ષેત્રે કુશળ કર્મચારીઓ તૈયાર કરવા માટે બ્રિક્સ એન્જિનિયરોનું સામાન્ય જૂથ અને યુવા નવીનતા કાર્યક્રમ શરૂ કરવાની છે.

ચીન દ્વારા અગાઉ શરૂ કરવામાં આવેલા ગ્લોબલ ડેવલપમેન્ટ ઇનિશિયેટિવ અંતર્ગત અત્યાર સુધીમાં ૧૨૦થી વધુ દેશોમાં ૨,૦૦૦થી વધુ પ્રોજેક્ટ્સ સફળતાપૂર્વક પૂર્ણ કરવામાં આવ્યા છે અને ૨૦૦,૦૦૦થી વધુ લોકોને તાલીમ આપવામાં આવી હોવાનો દાવો કરવામાં આવ્યો છે. આ ઉપરાંત, ચીને તેના રાજદ્વારી સંબંધો ધરાવતા તમામ ૫૩ આફ્રિકન દેશોને ટેરિફ-મુક્ત એક્સેસ પ્રદાન કરીને વૈશ્વિક વેપારમાં પોતાના પ્રભાવને વધુ મજબૂત કર્યો છે. આ નીતિગત પગલાંઓ દ્વારા ચીન ઉભરતા બજારો વચ્ચે પોતાના આર્થિક અને તકનીકી પગપેસારાને વધુ ગાઢ બનાવી રહ્યું છે, જે વૈશ્વિક સ્તરે નવા સમીકરણો સર્જી રહ્યા છે.

આગામી સમયમાં આ પાંચેય નવી પહેલોને જમીની સ્તરે ઉતારવા માટે બ્રિક્સ દેશો વચ્ચે આગામી વર્ષે સેવાઓમાં વેપાર પર વિશેષ ફોરમનું આયોજન કરવામાં આવશે અને નીતિગત સંકલનને વધુ વેગ આપવામાં આવશે. વૈશ્વિક બજારમાં અમેરિકા અને પશ્ચિમી દેશોના પ્રભુત્વ સામે ગ્લોબલ સાઉથના દેશોને પોતાની સાથે જોડીને ચીન વૈશ્વિક અર્થવ્યવસ્થામાં પોતાનું નેતૃત્વ સ્થાપિત કરવાનો વ્યૂહાત્મક પ્રયાસ કરી રહ્યું છે. નિષ્ણાતોના મતે, આ પગલાંઓ ભવિષ્યના વૈશ્વિક વેપાર અને તકનીકી ક્ષેત્રે મોટા પરિવર્તનોના એંધાણ આપી રહ્યા છે.