ટોક્યો, : જાપાન જવા ઈચ્છતા પ્રવાસીઓ અને ત્યાં વસવાટ કરવા માંગતા લોકો માટે એક મહત્વના અને ચોંકાવનારા સમાચાર સામે આવ્યા છે. જાપાન સરકારે 1 જુલાઈથી વિઝા ફીમાં ધરખમ વધારો કરવાનો નિર્ણય લીધો છે. લગભગ 48 વર્ષના લાંબા ગાળા બાદ જાપાનની વિઝા ફીમાં કરવામાં આવેલો આ પ્રથમ મોટો સુધારો છે, જે સીધો વિદેશી મુલાકાતીઓના ખિસ્સા પર અસર કરશે.

જાપાન ટાઇમ્સના અહેવાલ મુજબ, આ નિર્ણય કેબિનેટની બેઠકમાં લેવામાં આવ્યો છે. અત્યાર સુધી સિંગલ-એન્ટ્રી વિઝા માટે ¥3,000 ચૂકવવા પડતા હતા, જે હવે વધીને સીધા ¥15,000 થઈ જશે. તેવી જ રીતે, મલ્ટીપલ-એન્ટ્રી વિઝાની ફી ¥6,000 થી વધારીને ¥30,000 કરવામાં આવી છે. વિદેશ મંત્રી તોશિમિત્સુ મોટેગીએ સ્પષ્ટતા કરી છે કે 1978થી વિઝા ફીના દરો સ્થિર હતા, પરંતુ વધતી જતી મોંઘવારી અને વિનિમય દરમાં થતા ફેરફારોને ધ્યાનમાં રાખીને આ સુધારો અનિવાર્ય બન્યો છે.

આ ફી વધારા પાછળનો મુખ્ય હેતુ જાપાનમાં વધી રહેલી વિદેશી નાગરિકોની વસ્તીના સંચાલનનો છે. વર્ષ 2025ના અંત સુધીમાં જાપાનમાં વિદેશી રહેવાસીઓની સંખ્યા 4.13 મિલિયનના રેકોર્ડ સ્તરે પહોંચી ગઈ છે, જેને કારણે વહીવટી તંત્ર અને ઇમિગ્રેશન સેવાઓ પર ભારે દબાણ છે. નવી વસૂલાતમાંથી મળનારી રકમનો ઉપયોગ જાપાની ભાષાના શિક્ષણ કાર્યક્રમો અને ગેરકાયદેસર રોકાણ કરનારાઓ પર લગામ લગાવવા માટે કરવામાં આવશે.

માત્ર વિઝા ફી જ નહીં, પરંતુ સરકાર હવે રહેઠાણના દરજ્જામાં ફેરફાર અને કાયમી રહેઠાણની અરજીઓ માટે પણ ફીમાં મોટો વધારો કરવાની તૈયારીમાં છે. આગામી 31 માર્ચ, 2027 સુધીમાં કાયમી રહેઠાણ માટેની ફી ¥10,000 થી વધારીને ¥200,000 સુધી લઈ જવાનો સરકારનો પ્લાન છે. જાપાન સરકારનું માનવું છે કે અમેરિકા અને જર્મની જેવા પશ્ચિમી દેશોની તુલનામાં જાપાનની વિઝા ફી ઘણી ઓછી હતી, તેથી તેને આંતરરાષ્ટ્રીય ધોરણો સાથે સુસંગત કરવી જરૂરી છે.

જોકે, સરકારનો દાવો છે કે આ નિર્ણયથી પ્રવાસન ક્ષેત્ર પર કોઈ તાત્કાલિક માઠી અસર પડશે નહીં. તેમ છતાં, જાપાન પ્રવાસનું આયોજન કરી રહેલા ભારતીય પ્રવાસીઓ અને ત્યાં સ્થાયી થવા ઈચ્છતા લોકોએ હવે પોતાના બજેટમાં વધારો કરવો પડશે. જાપાનની આ નવી નીતિ સ્પષ્ટ કરે છે કે આવનારા સમયમાં ત્યાં કામદારો અને પ્રવાસીઓ માટેના નિયમો વધુ કડક અને ખર્ચાળ બની શકે છે.