કુવૈત સિટી : ખાડી દેશોમાં કામ કરવા ઈચ્છતા લોકો માટે કુવૈત સરકારે એક મોટો અને રાહતભર્યો નિર્ણય લીધો છે. કુવૈતના ગૃહ મંત્રાલયે ઘરેલુ ડ્રાઇવરો (Domestic Drivers) માટે નવી ઓનલાઇન એન્ટ્રી વિઝા સેવા શરૂ કરવાની જાહેરાત કરી છે. હવેથી કુવૈતી નાગરિકો સરકારની અધિકૃત 'સાહેલ' (Sahel) એપ્લિકેશન દ્વારા ઘરે બેઠા જ ડ્રાઇવરો માટે વિઝાની અરજી કરી શકશે, જેનાથી લાંબી અને જટિલ કાગળની પ્રક્રિયાઓનો અંત આવશે.
 
સેવા કેન્દ્રોના ધક્કા બંધ, બધું જ થશે ડિજિટલ
ગૃહ મંત્રાલયના જણાવ્યા અનુસાર, આ પહેલનો મુખ્ય હેતુ સરકારી પ્રક્રિયાઓને હાઈટેક બનાવવાનો અને લોકોનો સમય બચાવવાનો છે. અગાઉ નવા ડ્રાઇવરો માટે વિઝા મેળવવા માટે સરકારી સેવા કેન્દ્રોની રૂબરૂ મુલાકાત લેવી પડતી હતી, પરંતુ હવે 'સાહેલ' એપના માધ્યમથી આ કામ ચપટી વગાડતા થઈ જશે. આ ડિજિટલ પરિવર્તનથી ભ્રષ્ટાચારમાં ઘટાડો થશે અને પ્રક્રિયામાં વધુ પારદર્શિતા આવશે.
 
ભારતીય ડ્રાઇવરો માટે કેમ મહત્વના છે આ સમાચાર?
કુવૈતમાં મોટી સંખ્યામાં ભારતીય ડ્રાઇવરો રોજગારી મેળવે છે. વિઝા પ્રક્રિયા ઓનલાઇન અને ઝડપી બનવાને કારણે હવે ભારતીય કામદારોને કુવૈત જવા માટે વિઝાની મંજૂરી જલ્દી મળી શકશે. કુવૈત સરકાર છેલ્લા કેટલાક મહિનાઓથી વિદેશી કામદારો માટે રહેઠાણ ટ્રાન્સફર અને વિઝા ફીના નિયમોમાં પણ સતત સુધારા કરી રહી છે, જે ભારતીય પ્રવાસીઓ માટે સાનુકૂળ વાતાવરણ પૂરું પાડે છે.
 
‘સાહેલ’ એપ: કુવૈતનું નવું ડિજિટલ હથિયાર
કુવૈતની ‘સાહેલ’ એપ હાલમાં દેશની વ્યાપક ડિજિટલ ટ્રાન્સફોર્મેશન વ્યૂહરચનાનું કેન્દ્રબિંદુ બની છે. આ એક જ પ્લેટફોર્મ પરથી અનેક સરકારી સેવાઓ ઉપલબ્ધ કરાવીને કુવૈત એક સંકલિત ડિજિટલ સિસ્ટમ બનાવવા તરફ આગળ વધી રહ્યું છે. વિદેશી કામદારો માટે બહુવિધ-ટ્રિપ એક્ઝિટ પરમિટ જેવી સુવિધાઓ બાદ હવે ડ્રાઇવરો માટેની આ વિઝા સેવા કુવૈતની વહીવટી સુધારાની દિશામાં વધુ એક મોટું ડગલું છે.
 
ગૃહ મંત્રાલયનો વિઝનરી અભિગમ
માહિતી ટેકનોલોજી અને રેસીડેન્સી અફેર્સ સેક્ટરના સહયોગથી તૈયાર કરવામાં આવેલી આ સિસ્ટમ કાર્યક્ષમતા વધારવા માટે ડિઝાઇન કરવામાં આવી છે. અધિકારીઓએ જણાવ્યું હતું કે, આ નવીનતમ પગલું જાહેર વ્યવહારોને વધુ સરળ બનાવશે અને ઓનલાઇન સરકારી સેવાઓની પહોંચને વધુ વિસ્તૃત કરશે. ટૂંક સમયમાં અન્ય શ્રેણીના વિઝાને પણ આ જ રીતે ડિજિટલ પ્લેટફોર્મ પર લાવવાની યોજના છે.