થાઇલેન્ડ જવું હવે મુશ્કેલઃ વિઝા વિના નહીં મળે પ્રવેશ
થાઇ સરકારે ભારતીયો માટેની ૬૦ દિવસની વિઝા-મુક્ત પ્રવેશ સુવિધા બંધ કરી દીધી : હવે ભારતીયોને વિઝા ઓન અરાઇવલ દ્વારા પ્રવેશ મળશેઃ સરકારે સુરક્ષા અને ગેરકાયદેસર પ્રવૃત્તિઓને ધ્યાનમાં રાખીને નવા નિયમો અમલમાં મૂક્યા
બેંગ્કોક તા.૨૩: થાઇલેન્ડની મુલાકાત લેવાનું આયોજન કરતા ભારતીય પ્રવાસીઓ માટે મહત્વપૂર્ણ સમાચાર સામે આવ્યા છે. થાઇ સરકારે ભારતીયો સહિત ૯૩ દેશો માટે અમલમાં રહેલી ૬૦ દિવસની વિઝા-મુક્ત પ્રવેશ યોજના સમાપ્ત કરવાનો નિર્ણય લીધો છે. આ નવા નિર્ણય પછી હવે ભારતીય નાગરિકો વિઝા વિના થાઇલેન્ડમાં પ્રવેશ કરી શકશે નહીં. સરકારે આ પગલું સુરક્ષા મજબૂત બનાવવા, ગેરકાયદેસર રોજગાર રોકવા અને આંતરરાષ્ટ્રીય ગુનાઓ પર નિયંત્રણ મેળવવા માટે લીધું હોવાનું જણાવ્યું છે.
નવી વ્યવસ્થા અમલમાં આવ્યા બાદ ભારતીય પ્રવાસીઓએ હવે વિઝા ઓન અરાઇવલ પ્રક્રિયા દ્વારા વિઝા મેળવવો પડશે. એટલે કે, પ્રવાસીઓને થાઇલેન્ડ પહોંચ્યા બાદ એરપોર્ટ અથવા અધિકૃત ઇમિગ્રેશન ચેકપોઇન્ટ પર જરૂરી દસ્તાવેજો રજૂ કરીને વિઝા મેળવવા પડશે. આ વિઝા હેઠળ ભારતીય પ્રવાસીઓ માત્ર ૧૫ દિવસ સુધી જ થાઇલેન્ડમાં રહી શકશે. અગાઉ ભારતીયોને ૬૦ દિવસ સુધી વિઝા વિના રહેવાની મંજૂરી હતી અને જરૂરિયાત મુજબ તેને વધુ ૩૦ દિવસ સુધી લંબાવી પણ શકાતું હતું.
થાઇ સરકારે શરૂઆતમાં પર્યટન વધારવા અને અર્થતંત્રને ગતિ આપવા માટે ૬૦ દિવસની વિઝા-મુક્ત યોજના શરૂ કરી હતી. પરંતુ છેલ્લા કેટલાક સમયથી સુરક્ષા સંબંધિત મુદ્દાઓ અને ગેરકાયદેસર પ્રવૃત્તિઓ અંગે ચિતાઓ વધી રહી હતી. અહેવાલો અનુસાર, કેટલાક વિદેશી નાગરિકો લાંબા સમય સુધી દેશમાં રહી ગેરકાયદેસર વ્યવસાય કપટપૂર્ણ રોજગાર અને અન્ય ગેરકાયદેસર કાર્યોમાં સામેલ થતા હતા. આ પરિસ્થિતિને ધ્યાનમાં રાખીને સરકારે વિઝા નિયમોમાં મોટા ફેરફારો કરવાનો નિર્ણય લીધો.
થાઇલેન્ડ હવે ‘‘એક દેશ, એક વિઝા'' નીતિ અમલમાં મૂકી રહ્યું છે. આ નીતિ હેઠળ દરેક દેશ માટે માત્ર એક પ્રકારની વિઝા શ્રેણી રહેશે. સરકાર દ્વારા અનેક દેશોની વિઝા સુવિધાઓમાં સુધારા કરવામાં આવ્યા છે. હવે માત્ર ૫૪ દેશોને જ ૩૦ દિવસની વિઝા-મુક્ત સુવિધા મળશે, જ્યારે ભારત સહિત કેટલાક દેશોને વિઝા ઓન અરાઇવલ કેટેગરીમાં સ્થાન આપવામાં આવ્યું છે.
જે ભારતીય પ્રવાસીઓ પહેલાથી જ થાઇલેન્ડમાં હાજર છે અથવા નવા નિયમો લાગુ થાય તે પહેલાં ત્યાં પહોંચી ગયા છે, તેમના પર તાત્કાલિક કોઈ અસર નહીં થાય. તેઓ તેમની વર્તમાન પરમિટ પૂર્ણ થાય ત્યાં સુધી દેશમાં રહી શકશે. જોકે, નવા નિયમો લાગુ થયા બાદ લાંબા વેકેશન નું આયોજન કરતા પ્રવાસીઓને વધુ તૈયારી અને જરૂરી દસ્તાવેજો સાથે મુસાફરી કરવી પડશે.
દર વર્ષે લાખો ભારતીયો થાઇલેન્ડની મુલાકાત લે છે. સસ્તી મુસાફરી સુંદર દરિયાકિનારા નાઇટલાઇફ અને સરળ પ્રવેશ નિયમોના કારણે થાઇલેન્ડ ભારતીય પ્રવાસીઓ માટે ખૂબ જ લોકપ્રિય ડેસ્ટિનેશન બન્યું છે. પરંતુ હવે નવા વિઝા નિયમો બાદ મુસાફરીની પ્રક્રિયામાં બદલાવ આવતા પ્રવાસીઓએ અગાઉથી સંપૂર્ણ આયોજન કરવું જરૂરી બનશે
(10:30 AM IST)
છેલ્લા 8 દિવસમાં સૌથી લોકપ્રિય 
