નવી દિલ્હી, તા.૧૯: આંતરરાષ્ટ્રીય સ્તરે વધી રહેલા ભૌગોલિક રાજકીય તણાવની સીધી અસર હવે ઘરેલુ બુલિયન બજાર પર જોવા મળી રહી છે. શુક્રવારે સોના અને ચાંદીના ભાવમાં મોટો વધારો નોંધાયો હતો, જેમાં સોનાનો ભાવ પ્રતિ ૧૦ ગ્રામ દીઠ આશરે રૂ. ૮૦૦ જેટલો વધીને સ્થાનિક બજારમાં રૂ. ૧.૪૭ લાખના સ્તરે ટ્રેડ થઈ રહ્યો છે. અમેરિકા અને ઈરાન વચ્ચે વધી રહેલા તણાવને કારણે વૈશ્વિક સ્તરે રોકાણકારો સોના જેવી સુરક્ષિત સંપત્તિ તરફ વળ્યા છે, જેનાથી કિંમતી ધાતુઓના ભાવને મજબૂત ટેકો મળ્યો છે.

મીડિયા અહેવાલો અનુસાર, યુએસ સેના દ્વારા ઈરાન સામે સંભવિત કાર્યવાહીના વિકલ્પો તૈયાર કરવામાં આવ્યા છે, જેના કારણે બંને દેશો વચ્ચે તણાવ ચરમસીમાએ પહોંચ્યો છે. આ વૈશ્વિક અશાંતિની અસર સ્થાનિક વાયદા બજાર પર પણ સ્પષ્ટ દેખાઈ રહી છે. મલ્ટી કમોડિટી એક્સચેન્જ (MCX) પર સોનાનો વાયદો ૦.૧૧ ટકા વધીને રૂ. ૧,૪૭,૯૭૦ પ્રતિ ૧૦ ગ્રામ પર પહોંચ્યો હતો, જ્યારે ચાંદીનો વાયદો પણ ૦.૫૧ ટકાના ઉછાળા સાથે રૂ. ૨,૧૨,૩૭૦ પ્રતિ કિલોગ્રામ પર ટ્રેડ થઈ રહ્યો હતો.

દેશના મુખ્ય મહાનગરોમાં સોનાના તાજેતરન ભાવો પર નજર કરીએ તો, રાજધાની દિલ્હીમાં ૨૪ કેરેટ સોનાનો ભાવ પ્રતિ ૧૦ ગ્રામ રૂ. ૧,૪૭,૯૭૦ અને ૨૨ કેરેટ સોનાનો ભાવ રૂ. ૧,૩૫,૬૪૦ નોંધાયો છે. આર્થિક રાજધાની મુંબઈમાં ૨૪ કેરેટ સોનાનો ભાવ રૂ. ૧,૪૮,૩૯૦ અને ૨૨ કેરેટ સોનાનો ભાવ રૂ. ૧,૩૬,૦૦૦ ચાલી રહ્યો છે. આ ઉપરાંત ચેન્નાઈમાં ૨૪ કેરેટ સોનું રૂ. ૧,૪૮,૦૨૦ જ્યારે ઉત્તર પ્રદેશ અને બિહારના બજારોમાં પણ સોનાના ભાવ રૂ. ૧.૪૮ લાખની આસપાસ મજબૂત બનેલા છે.

બજારના નિષ્ણાતોના મતે, ૨૪ કેરેટ સોનું સૌથી શુદ્ધ (૯૯.૯%) હોય છે પરંતુ તે ખૂબ નરમ હોવાથી તેના સીધા ઘરેણાં બનતા નથી, જ્યારે ૨૨ કેરેટ સોનામાં અન્ય ધાતુઓનું મિશ્રણ કરીને તેને મજબૂત બનાવવામાં આવે છે જેનો ઉપયોગ દાગીના બનાવવા માટે થાય છે. મધ્ય પૂર્વમાં ચાલી રહેલા તણાવને જોતા આગામી દિવસોમાં પણ સોના-ચાંદીના ભાવમાં ઉતાર-ચઢાવ જળવાઈ રહેવાની પૂરી સંભાવના છે.