બ્યુએનોસ એયર્સ : આર્જેન્ટિના સરકારે વિદેશી રોકાણકારોને આકર્ષવા માટે તેના ડ્રાફ્ટ કરાયેલા 'સિટીઝનશિપ બાય ઇન્વેસ્ટમેન્ટ' (રોકાણ દ્વારા નાગરિકતા) પ્રોગ્રામની નવી વિગતો જાહેર કરી છે, જે ૨૦૨૬ના ચોથા ત્રિમાસિક ગાળા સુધીમાં સત્તાવાર રીતે શરૂ થવાની અપેક્ષા છે. આ યોજના હેઠળ ભારતીય રોકાણકારો અને તેમના પરિવારજનો સામાન્ય રીતે જરૂરી એવી બે વર્ષની સ્થાનિક નિવાસની શરત વિના આર્જેન્ટિનાની સીધી નાગરિકતા મેળવી શકશે. આર્જેન્ટિનાના સત્તાવાળાઓ દ્વારા રોકાણની રકમ, પાત્રતા અને સુરક્ષા તપાસ સંબંધિત પ્રાથમિક માપદંડો નક્કી કરી દેવામાં આવ્યા છે.

આ યોજના હેઠળ વિદેશી નાગરિકો માટે રોકાણના બે મુખ્ય વિકલ્પો પૂરા પાડવામાં આવ્યા છે. પ્રથમ વિકલ્પ હેઠળ અરજદારે આર્જેન્ટિનાના નેશનલ ટ્રેઝરીમાં $૩,૫૦,૦૦૦ (આશરે ₹૨.૯ કરોડ) નું બિન-રિફંડેબલ દાન આપવાનું રહેશે. બીજા વિકલ્પ તરીકે, અરજદારો નાગરિકતા કાર્યક્રમ માટે વિશેષ રૂપે બહાર પાડવામાં આવતા સરકારી બોન્ડ્સમાં $૮,૦૦,૦૦૦ નું રોકાણ કરી શકે છે. આ રકમ દ્વારા દેશની આર્થિક સ્થિતિને મજબૂત કરવાનો અને વિદેશી મૂડીરોકાણ વધારવાનો લક્ષ્યાંક રાખવામાં આવ્યો છે.

મુખ્ય અરજદાર ઉપરાંત તેમના પરિવારના સભ્યોને પણ આ નાગરિકતા યોજનામાં સાંકળી લેવાની જોગવાઈ રાખવામાં આવી છે. પરિવારના સભ્યો માટે પારિવારિક સંબંધોનો પુરાવો આપવો અને વધારાનું યોગદાન ચૂકવવું જરૂરી રહેશે. જેમાં જીવનસાથી માટે $૧,૦૦,૦૦૦ તેમજ ૧૮ થી ૨૫ વર્ષની વયના અપરિણીત નિર્ભર બાળકો માટે પણ $૧,૦૦,૦૦૦ નો વધારાનો ફાળો નક્કી કરાયો છે, જ્યારે ૧૮ વર્ષથી ઓછી ઉંમરના બાળકો માટે આ ફાળો $૨૫,૦૦૦ રહેશે.

ભારતીય અરજદારો માટે માત્ર નાણાકીય રોકાણ પૂરતું નથી, પરંતુ તેમણે અત્યંત કડક નાણાકીય અને સુરક્ષા તપાસમાંથી પસાર થવું પડશે. રોકાણ માટે વપરાતું ભંડોળ આર્જેન્ટિનાની સેન્ટ્રલ બેંક દ્વારા માન્યતા પ્રાપ્ત નાણાકીય સંસ્થાઓમાંથી જ સ્થાનાંતરિત થવું ફરજિયાત છે. આ ઉપરાંત, અરજદારોની ઓળખ, ભંડોળના કાયદેસરના સ્ત્રોત, ગુનાહિત ભૂતકાળ, પ્રતિષ્ઠા અને ઇમિગ્રેશન ઇતિહાસની મની લોન્ડરિંગ વિરોધી (AML) અને આતંકવાદ વિરોધી ધિરાણ નિયમો હેઠળ સંપૂર્ણ તપાસ કરવામાં આવશે.

અરજીઓની ચકાસણી માટે આર્જેન્ટિનાની નાગરિકતા એજન્સી દેશની ગુપ્તચર વિભાગ, સુરક્ષા દળો અને નાણાકીય અધિકારીઓ સાથે મળીને ડેટા ચકાસશે. તમામ તપાસ પૂર્ણ થયા બાદ એજન્સી રાષ્ટ્રીય ઇમિગ્રેશન ડિરેક્ટોરેટને ભલામણ મોકલશે, જે નાગરિકતા મંજૂર કરવા કે નકારવાનો આખરી આદેશ જારી કરશે. આ સમગ્ર પ્રક્રિયા દેશની સુરક્ષા સાથે બાંધછોડ કર્યા વિના પારદર્શક રીતે ચલાવવાનો દાવો કરવામાં આવ્યો છે.

આર્જેન્ટિનાની ઇમિગ્રેશન સિસ્ટમમાં સુધારાના ભાગરૂપે કડક નિયમો સાથે આ સીધો નાગરિકતાનો માર્ગ તૈયાર કરવામાં આવ્યો છે. ભારતીય અરજદારો માટે હવે અરજી પ્રક્રિયાની ફી, જરૂરી દસ્તાવેજો, પ્રોસેસિંગ સમય અને સ્થાનિક હાજરી સંબંધિત આખરી સૂચનાઓની રાહ જોવાઈ રહી છે. આર્જેન્ટિના સરકાર આ વર્ષના અંત સુધીમાં અરજીઓ સ્વીકારવાનું શરૂ કરે તે પહેલાં વિગતવાર માર્ગદર્શિકા બહાર પાડશે.