નવી દિલ્હી : રેલવે દ્વારા મુસાફરોની સુવિધામાં વધારો કરવા માટે વધુ એક મહત્વપૂર્ણ પગલું ભરવામાં આવ્યું છે. દેશની બીજી અત્યાધુનિક 'વંદે ભારત સ્લીપર ટ્રેન' ને સત્તાવાર મંજૂરી મળી ગઈ છે, જે આગામી સમયમાં પવિત્ર નગરી વારાણસી અને દેશની રાજધાની નવી દિલ્હી વચ્ચે દોડતી થશે. આ હાઇ-સ્પીડ સ્લીપર ટ્રેન શરૂ થવાથી ઉત્તર પ્રદેશના મુખ્ય શહેરો અને પૂર્વાંચલના પ્રવાસીઓ માટે દિલ્હીની સફર અત્યંત આરામદાયક અને સમયની બચત કરનાર સાબિત થશે.

કાનપુર અને પ્રયાગરાજમાં સ્ટોપેજ સાથે પ્રસ્તાવિત સમયપત્રક

પ્રસ્તાવિત સમયપત્રક મુજબ આ વંદે ભારત સ્લીપર ટ્રેન વારાણસીથી રાત્રે ૮:૪૦ વાગ્યે ઉપડશે, જે રાત્રે ૧૦:૦૫ વાગ્યે પ્રયાગરાજ અને ૧૧:૫૦ વાગ્યે કાનપુર સેન્ટ્રલ પહોંચશે. ત્યારબાદ સવારે આ લગભગ ૪:૫૦ વાગ્યે નવી દિલ્હી રેલવે સ્ટેશન પર પહોંચી જશે. આમ, વારાણસીથી દિલ્હીનું લાંબુ અંતર માત્ર ૮ કલાક અને ૧૦ મિનિટમાં પૂરું થઈ જશે. તેવી જ રીતે, પરત ફરતી વખતે આ ટ્રેન નવી દિલ્હીથી રાત્રે ૧૧:૨૫ વાગ્યે રવાના થઈને સવારે કાનપુર, પ્રયાગરાજ થઈને સવારે ૭:૩૫ વાગ્યે વારાણસી પરત પહોંચશે.

વડાપ્રધાન કાર્યાલયની મંજૂરી બાદ સત્તાવાર જાહેરાતની શક્યતા

હાલમાં રેલવે દ્વારા આ સમયપત્રક પ્રસ્તાવિત કરવામાં આવ્યું છે અને વડાપ્રધાન કાર્યાલય (PMO) તરફથી આખરી મંજૂરી મળ્યા બાદ ટ્રેનના સંચાલનની તારીખ અને અંતિમ ટાઇમટેબલ જાહેર કરવામાં આવશે. આ હાઇ સ્પીડ સ્લીપર ટ્રેનના આગમનથી મુસાફરોને રાત્રે આરામદાયક ઊંઘ સાથે ગંતવ્ય સ્થાન સુધી પહોંચવાનો નવો અને શ્રેષ્ઠ વિકલ્પ મળી રહેશે.