નવી દિલ્હી, તા.19: દેશના લાખો નોકરીયાત કર્મચારીઓ માટે કર્મચારી ભવિષ્ય નિધિ સંગઠન (EPFO) દ્વારા પીએફ (PF) ઉપાડના નિયમોમાં અત્યંત મહત્વપૂર્ણ અને રાહતરૂપ ફેરફારો કરવામાં આવ્યા છે. નવા નિયમો હેઠળ હવે માત્ર ૧૨ મહિનાની નોકરી પૂર્ણ કરનાર કર્મચારીઓ પણ પોતાની જરૂરિયાતના સમયે પીએફ ખાતામાંથી સરળતાથી રકમ ઉપાડી શકશે. ઇમરજન્સી અને આર્થિક જરૂરિયાતોને ધ્યાનમાં રાખીને તંત્ર દ્વારા આંશિક ઉપાડની મર્યાદાઓ અને સેવાના સમયગાળાની શરતોને ઘણી હળવી કરવામાં આવી છે.

નવા નિયમ મુજબ, જો કોઈ કર્મચારીના પીએફ ખાતામાં કુલ ₹૨ લાખની રકમ જમા હોય, તો તે પોતાની જરૂરિયાત મુજબ મહત્તમ ૭૫ ટકા સુધી એટલે કે ₹૧.૫૦ લાખ સુધીનો એડવાન્સ ઉપાડ કરી શકે છે. આ ઉપાડ બાદ પણ ખાતામાં ૨૫ ટકા એટલે કે ₹૫૦,૦૦૦ ની લઘુત્તમ શિલક જળવાઈ રહેશે. આ ફેરફારનો મુખ્ય હેતુ કર્મચારીઓને સંકટના સમયે નાણાકીય રાહત આપવાની સાથે તેમની ભવિષ્યની નિવૃત્તિ બચતને સુરક્ષિત રાખવાનો છે.

વિશેષ જરૂરિયાતો માટે ઉપાડની સંખ્યામાં પણ મોટો વધારો કરવામાં આવ્યો છે. હવે કર્મચારીઓ પોતાના કે બાળકોના ઉચ્ચ શિક્ષણ માટે પોતાની સમગ્ર સેવા દરમિયાન વધુમાં વધુ ૧૦ વખત એડવાન્સ રકમ ઉપાડી શકશે. આ ઉપરાંત પોતાના અથવા પરિવારના સભ્યોના લગ્ન પ્રસંગ માટે સેવા દરમિયાન કુલ ૫ વખત સુધી પીએફમાંથી નાણાં ઉપાડવાની વિશેષ છૂટછાટ આપવામાં આવી છે.

તબીબી સારવાર અને મકાન સંબંધિત જરૂરિયાતો માટે પણ નિયમો અત્યંત સરળ બનાવાયા છે. પરિવારની તબીબી સારવાર, નવું ઘર કે પ્લોટ ખરીદવા, ઘરનું બાંધકામ, હોમ લોનની ચુકવણી અથવા ઘરના સમારકામ જેવા કાર્યો માટે કર્મચારીઓ મહત્તમ ૫ વખત સુધી રકમ ઉપાડી શકશે. આ પગલાથી મધ્યમ વર્ગના કર્મચારીઓને મોટો આર્થિક ટેકો મળી રહેશે.

નોકરી ગુમાવવાના કિસ્સામાં પણ કર્મચારીઓને તાત્કાલિક રાહત આપવાની જોગવાઈ કરવામાં આવી છે. બેરોજગારીની સ્થિતિ સર્જાય ત્યારે કર્મચારી પોતાના પીએફ બેલેન્સમાંથી તાત્કાલિક ૭૫ ટકા સુધીની રકમ ઉપાડી શકશે. જોકે, પીએફ ખાતામાંથી ૧૦૦ ટકા એટલે કે સંપૂર્ણ રકમ ઉપાડવા માટે કર્મચારીએ સતત ૧૨ મહિના સુધી બેરોજગાર રહેવું આવશ્યક રહેશે.

અગાઉ પીએફ ઉપાડ માટે જટિલ પ્રક્રિયાઓ અને લાંબા સમયગાળાની શરતો હોવાથી કર્મચારીઓને મુશ્કેલી પડતી હતી. નવા સુધારાઓ અમલી બનતાં હવે લાખો કર્મચારીઓને નાણાકીય લવચીકતા મળશે. નિવૃત્તિની વય પ્રાપ્ત કરવા પર અથવા કાયમી અપંગતા જેવા કિસ્સાઓમાં સંપૂર્ણ રકમ ઉપાડવાના જૂના નિયમો યથાવત રહેશે, જ્યારે ઓનલાઈન પોર્ટલ દ્વારા આ ઉપાડ પ્રક્રિયા વધુ ઝડપી બનશે.