મુંબઈ, તા.૧૯: છેલ્લા કેટલાક અઠવાડિયાથી અસહ્ય ગરમી, અકળાવનારા ભેજ અને વાયુ પ્રદૂષણનો સામનો કરી રહેલા મુંબઈના રહેવાસીઓ માટે રાહતના સમાચાર આવ્યા છે. ભારતીય હવામાન વિભાગ (IMD) ના જણાવ્યા અનુસાર, જો વાતાવરણની પરિસ્થિતિ અનુકૂળ રહેશે તો આ વર્ષે દક્ષિણ-પશ્ચિમ ચોમાસું ૫ કે ૬ જૂનની આસપાસ મુંબઈમાં દસ્તક આપી શકે છે. વરસાદની ચાતક નજરે રાહ જોઈ રહેલા મુંબઈગરાંઓ માટે હવે બહુ લાંબી પ્રતીક્ષા કરવી નહીં પડે.

ચોમાસાની નવીનતમ સ્થિતિ અંગે વિગતો આપતા મુંબઈ હવામાન વિભાગના ડાયરેક્ટર બિક્રમ સિંહે જણાવ્યું હતું કે, પ્રારંભિક અંદાજ મુજબ ૨૬ મે ની આસપાસ કેરળમાં ચોમાસાનું સત્તાવાર આગમન થઈ જશે. સામાન્ય રીતે, ચોમાસાની સિસ્ટમને કેરળથી દરિયાકાંઠાના વિસ્તારો થઈને મુંબઈ સુધી પહોંચવામાં અંદાજે ૧૦ દિવસ જેટલો સમય લાગે છે. જો કે, અરબી સમુદ્ર અને દક્ષિણ ભારતમાં વાતાવરણના બદલાવને કારણે આ સમયરેખામાં ૩ થી ૪ દિવસનો વહેલો-મોડો ફેરફાર થઈ શકે છે.

કેરળ બાદ ગોવા થઈને મહારાષ્ટ્રમાં પ્રવેશશે મેઘરાજા

હવામાન વિભાગના મોડેલ સૂચવે છે કે કેરળમાં પ્રવેશ્યા બાદ એક અઠવાડિયાની અંદર ચોમાસું ગોવાના ભાગોને આવરી લેશે અને ત્યાંથી ઉત્તર તરફ આગળ વધીને દરિયાકાંઠાના મહારાષ્ટ્ર અને મુંબઈમાં પ્રવેશ કરશે. મુંબઈમાં ચોમાસાનું આગમન માત્ર ગરમીથી જ રાહત નથી આપતું, પરંતુ મુંબઈ મેટ્રોપોલિટન પ્રદેશ (MMR) ને પીવાનું પાણી પૂરું પાડતા સાત મુખ્ય જળાશયોને ભરવા માટે પણ અત્યંત મહત્વનું છે.

પ્રી-મોન્સૂન વરસાદની પણ શક્યતા

હવામાન વૈજ્ઞાનિકોના મતે, ચોમાસાના સત્તાવાર આગમન પહેલાં પણ મહારાષ્ટ્રના કેટલાક વિસ્તારોમાં પ્રી-મોન્સૂન એટલે કે ચોમાસા પૂર્વેનો હળવોથી મધ્યમ વરસાદ પડી શકે છે. હાલમાં હવામાનના બદલાતા મોડેલો પર ખૂબ જ બારીકાઈથી નજર રાખવામાં આવી રહી છે અને આગામી દિવસોમાં ચિત્ર વધુ સ્પષ્ટ બનશે. જો હાલની આગાહી યથાવત રહેશે તો જૂનના પ્રથમ અઠવાડિયામાં મુંબઈ આ વર્ષના ચોમાસાનું સ્વાગત કરવા સજ્જ થઈ જશે.