નવી દિલ્હી, તા.15: કર્મચારી ભવિષ્ય નિધિ સંગઠન (EPFO) સાથે જોડાયેલા કરોડો સભ્યો માટે રાહતના સમાચાર આવ્યા છે. નાણાકીય વર્ષ 2025-26 માટે EPFO એ સભ્યોના ખાતામાં 8.25 ટકાના દરે વ્યાજ જમા કરવાની પ્રક્રિયાનો સત્તાવાર આરંભ કરી દીધો છે. આ વ્યાજની રકમ આજથી એટલે કે 15 જુલાઈથી સભ્યોના પીએફ ખાતાની પાસબુકમાં દેખાવાની શરૂ થઈ જશે. જોકે, કરોડો ખાતાઓને અપડેટ કરવામાં થોડો સમય લાગી શકે છે, તેથી જો તમારી પાસબુકમાં તરત જ રકમ ન દેખાય તો ગભરાવાની જરૂર નથી.
આ વર્ષનું વ્યાજ જમા કરવાની પ્રક્રિયા ખૂબ જ ખાસ છે, કારણ કે EPFO એ હવે તેના તમામ રેકોર્ડ્સને નવા 'સેન્ટ્રલાઇઝ્ડ IT સક્ષમ સેવાઓ' (CITES) પ્લેટફોર્મ પર સ્થાનાંતરિત કર્યા છે. અગાઉ દરેક પ્રાદેશિક કચેરીઓનો ડેટા અલગ-અલગ રહેતો હતો, પરંતુ હવે સમગ્ર દેશના સભ્યોનો ડેટા એક જ રાષ્ટ્રીય પ્લેટફોર્મ પર ઉપલબ્ધ છે. શ્રમ મંત્રાલયનું માનવું છે કે આ નવી ટેકનિકલ વ્યવસ્થાને કારણે હવે પીએફ સંબંધિત સેવાઓ વધુ ઝડપી બનશે અને દાવાઓના નિકાલમાં થતો વિલંબ ઘટશે.
વ્યાજ જમા કરવા માટે સભ્યોએ કોઈ અલગથી વિનંતી કે અરજી કરવાની જરૂર નથી. વ્યાજની ગણતરી આપોઆપ થઈને સભ્યોના ખાતામાં ઉમેરાઈ જશે. સભ્યો પોતાનું અપડેટેડ બેલેન્સ ચેક કરવા માટે EPFO સભ્ય પાસબુક પોર્ટલ પર પોતાના 12-અંકના યુનિવર્સલ એકાઉન્ટ નંબર (UAN) અને પાસવર્ડ દ્વારા લોગ-ઈન કરી શકે છે. સુરક્ષાના ભાગરૂપે, તમારા રજિસ્ટર્ડ મોબાઈલ નંબર પર આવતા OTP દ્વારા ચકાસણી કર્યા પછી તમે પાસબુક જોઈ શકશો.
જો કોઈ કારણસર તમારી પાસબુકમાં વ્યાજ જમા થવામાં થોડો વિલંબ થાય, તો પણ ચિંતા કરવાની જરૂર નથી. ઈપીએફના નિયમો મુજબ વ્યાજની ગણતરી માસિક બેલેન્સના આધારે જ થાય છે, તેથી તમારી એક પણ રૂપિયો કપાશે નહીં. પાસબુક અપડેટ થવામાં થોડા દિવસોનો સમય લાગી શકે છે, પરંતુ તે સમયગાળાનું સંપૂર્ણ વ્યાજ તમને ચોક્કસપણે મળશે જ. પાસબુક ઉપરાંત, તમે 'ઉમંગ એપ' (UMANG App) દ્વારા પણ ગમે ત્યારે પીએફનું સ્ટેટમેન્ટ ડાઉનલોડ કરી શકો છો અને તમારા યોગદાન પર નજર રાખી શકો છો.