વિક્ટોરિયા (કેનેડા), તા. ૨૭: કેનેડાના બ્રિટિશ કોલંબિયા (BC) પ્રાંતે ઇમિગ્રેશન ક્ષેત્રે એક ક્રાંતિકારી નિર્ણય લીધો છે. અત્યાર સુધી માત્ર ડોકટરો અને નર્સો જેવા ઉચ્ચ લાયકાત ધરાવતા વ્યાવસાયિકો માટે જ PR ના માર્ગો સરળ હતા, પરંતુ હવે જાહેર આરોગ્ય સુવિધાઓમાં કામ કરતા સફાઈ કર્મચારીઓ (Housekeeping) અને સુરક્ષા ગાર્ડ્સ (Security Staff) પણ કેનેડામાં કાયમી વસવાટ કરી શકશે. બ્રિટિશ કોલંબિયા સરકારે આવા ૨૫૦ કામદારો માટે એક વિશેષ 'વન-ટાઇમ' ઇમિગ્રેશન માર્ગની જાહેરાત કરી છે.
આવશ્યક સેવાઓને સન્માન
આ અનોખી પહેલનો મુખ્ય હેતુ પ્રાંતના ગ્રામીણ અને અંતરિયાળ વિસ્તારોમાં આરોગ્યસંભાળ વ્યવસ્થાને મજબૂત બનાવવાનો છે. સરકારનું માનવું છે કે હોસ્પિટલોમાં સફાઈ અને સુરક્ષા જાળવતા કર્મચારીઓ પણ આરોગ્ય સેવાઓનો અભિન્ન હિસ્સો છે. આ કામદારો સામાન્ય રીતે સ્ટાન્ડર્ડ ઇમિગ્રેશન પ્રોગ્રામ્સ હેઠળ પાત્ર ગણાતા નથી, પરંતુ આ નવા ફેરફારથી તેમને મોટી રાહત મળશે.
કોણ કરી શકશે અરજી?
બ્રિટિશ કોલંબિયા પ્રાંતીય નોમિની પ્રોગ્રામ (BC PNP) હેઠળ જાહેર કરાયેલ આ યોજનામાં એવા કામદારો ભાગ લઈ શકશે જેઓ પહેલેથી જ પ્રાંતીય હેલ્થ ઓથોરિટી હેઠળ સફાઈ અથવા સુરક્ષાની ભૂમિકામાં કાર્યરત છે. ખાસ કરીને જેઓ મેટ્રો વાનકુવરની બહારના વિસ્તારોમાં સેવા આપી રહ્યા છે, તેમને પ્રાથમિકતા આપવામાં આવશે. પ્રાંતે લક્ષ્ય રાખ્યું છે કે તેના કુલ નામાંકન (Nominations) ના ૩૫ ટકા મેટ્રો વાનકુવરની બહારના ઉમેદવારોને મળે.
અરજીની પ્રક્રિયા અને સમયરેખા
આ કાર્યક્રમ માટે 'એક્સપ્રેશન ઓફ ઇન્ટરેસ્ટ' (EOI) સિસ્ટમ દ્વારા પ્રવેશ આપવામાં આવશે. જૂન ૨૦૨૬ માં આ વિન્ડો ખુલશે. જોકે ૨૫૦ ની મર્યાદા હોવાથી આ પ્રક્રિયા ઘણી સ્પર્ધાત્મક રહેવાની શક્યતા છે. સરકાર આગામી મહિનાઓમાં આ અંગેના ચોક્કસ માપદંડો અને દસ્તાવેજોની યાદી જાહેર કરશે.
નવી વ્યુહરચના: સંભાળ, નિર્માણ અને નવીનતા
આ ફેરફાર બ્રિટિશ કોલંબિયાની નવી ઇમિગ્રેશન વ્યુહરચનાનો એક ભાગ છે, જે ત્રણ મુખ્ય ક્ષેત્રો - સંભાળ (Care), નિર્માણ (Construction) અને નવીનતા (Innovation) પર ધ્યાન કેન્દ્રિત કરે છે. 'સંભાળ' શ્રેણી હેઠળ આ પગલું લેવામાં આવ્યું છે જેથી નાના સમુદાયોમાં હોસ્પિટલ અને ક્લિનિક્સમાં સ્ટાફની અછતને પૂરી કરી શકાય. કેનેડામાં સ્થાયી થવા ઈચ્છતા ભારતીય કામદારો માટે આ એક સુવર્ણ તક સાબિત થઈ શકે છે.