હૈદરાબાદ : ભારતના રમતગમત ક્ષેત્રે ઉભરતા યુવા સ્ટાર્સ માટે એક ઉત્સાહજનક સમાચાર સામે આવ્યા છે. વર્ષ ૨૦૨૬માં યોજાનારી પ્રતિષ્ઠિત '૮મી ખેલો ઇન્ડિયા યુથ ગેમ્સ'ની યજમાની આ વખતે તેલંગાણા રાજ્યને સોંપવામાં આવી છે. કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ આજે સત્તાવાર રીતે આ જાહેરાત કરીને દેશભરના રમતવીરોમાં નવો જોશ ભરી દીધો છે.

આ મહત્વાકાંક્ષી સ્પર્ધા અંગે માહિતી આપતાં કેન્દ્રીય મંત્રીએ જણાવ્યું હતું કે, ખેલો ઇન્ડિયા યુથ ગેમ્સનું આ આગામી સંસ્કરણ દેશના ખૂણે-ખૂણેથી આવતા યુવાનોને તેમની અદભુત રમતગમત પ્રતિભા અને કૌશલ્યનું પ્રદર્શન કરવા માટે એક શાનદાર અને મજબૂત પ્લેટફોર્મ પૂરું પાડશે. આ ગેમ્સના માધ્યમથી અનેક એવા રમતવીરો દેશની સામે આવશે જેઓ ભવિષ્યમાં આંતરરાષ્ટ્રીય સ્તરે ભારતનું પ્રતિનિધિત્વ કરશે.

પીએમ મોદીના વિઝનને આગળ ધપાવતી પહેલ

મંત્રી માંડવિયાએ વધુમાં ઉમેર્યું હતું કે, આ આખી પહેલ વડાપ્રધાન નરેન્દ્ર મોદીના એ દૂરોગામી વિઝન દ્વારા પ્રેરિત છે, જે અંતર્ગત દેશભરમાં પાયાના સ્તરે (ગ્રાઉન્ડ લેવલ પર) છુપાયેલી રમતગમતની ક્ષમતાઓને ઓળખીને તેને યોગ્ય તાલીમ અને પ્રોત્સાહન પૂરું પાડવાનું છે. તેલંગાણામાં યોજાનારી આ મેગા સ્પર્ધા માટે અત્યારથી જ વહીવટી તંત્ર અને રમતગમત સંગઠનો સજ્જ બન્યા છે. વિવિધ રાજ્યોના હજારો યુવા એથ્લેટ્સ આ રમતોત્સવમાં ભાગ લઈને મેડલ જીતવા માટે પોતાનું નસીબ અને મહેનત અજમાવશે, જે ભારતમાં સ્પોર્ટ્સ કલ્ચરને વધુ ઊંચાઈ પર લઈ જશે.